သင်သည် ခရီးသွားနေစဉ်အချိန်အတွင်း အယောင်ဆောင်လိမ်လည် ခိုးယူခံရနိုင်ချေ အများဆုံးဖြစ်သည်။ မည်သည့်နေရာကို သွားရောက် လည်ပတ်သည်ဖြစ်စေ ခရီးသွားချိန်တွင် သင်သည် အဖိုးတန် ပစ္စည်းများကို ပုံမှန်ထက်ယူဆောင်သွားဖို့ရာရှိသည်။ နိုင်ငံရပ်ခြားသို့ ခရီးသွားနေစဉ်အတွင်း အယောင်ဆောင်လိမ်လည်ခိုးယူခံရခြင်းကို ကာကွယ်ရန်အတွက် ကြိုတင်ပြင်ဆင်ထားရန် အလွန်အရေးကြီးပါသည်။

buying a home

ငွေပေးချေမှုများ
ပိုက်ဆံအိတ် မကြာခဏ ခိုးယူခံရခြင်းသည် အယောင်ဆောင် လိမ်လည်ခိုးယူခံခြင်းအတွက် လမ်းစတစ်ခုဖြစ်သည်။ ထို့ကြောင့် ခရီးသွားသည့်အခါ ခေါက်ပိုက်ဆံအိတ်ကို အိတ်ကပ်ထဲတွင်ထည့်ကာ ယူဆောင်သွားခြင်း သို့မဟုတ် လွယ်အိတ်ထဲတွင် အလွယ်တကူ ထည့်ထားခြင်းတို့ထက် ခရီးဆောင်ခါးပတ်ပိုက်ဆံအိတ်ကို အသုံးပြုပါ။ ခရီးဆောင်ခါးပတ်ပိုက်ဆံအိတ် အသုံးပြုခြင်းဖြင့် ခေါက်ပိုက်ဆံအိတ်ကို တစ်နေရာရာတွင် အလွယ်တကူအမှတ်တမဲ့ ချထားခဲ့မိခြင်းတို့မှလည်း ကာကွယ်ပေးနိုင်ပါသည်။ အရေးကြီးသည့် အချက်အလက်များကို အခြားသူများမမြင်ရနိုင်သည့်နေရာတွင် သိမ်းဆည်းခြင်းဖြင့်လည်း သင်၏ ကိုယ်ရေးကိုယ်တာငွေကြေးဆိုင်ရာ အသေးစိတ် အချက်အလက်များကို အယောင်ဆောင်လိမ်လည် ခိုးယူသူတို့၏ ရန်မှကာကွယ်နိုင်ပါသည်။ စားသောက်ဆိုင်တွင် အကြွေးဝယ်ခွင့်ကတ်နှင့် ငွေပေးချေပါက ငွေရှင်းပြေစာပေါ်တွင် လက်မှတ်ထိုးရန်နှင့် ထိုပြေစာကို ဆိုင်၏ စားပွဲထိုးအား တိုက်ရိုက်ပေးရန်အတွက် သတိထားပါ။ ထို့ပြင် ထိုပြေစာမိတ္တူကိုလည်း တောင်းယူသိမ်းဆည်းပါ။ ချက်လက်မှတ်စာအုပ်ကို အိမ်တွင် မီးခံသေတ္တာ သို့မဟုတ် အံဆွဲထဲတွင် သေချာစွာသော့ခတ်သိမ်းဆည်းထားခဲ့ပါ။

နည်းပညာ
သင်၏ စမတ်ဖုန်းကို ရှုပ်ထွေးသည့် လျှို့ဝှက်နံပါတ်များ သို့မဟုတ် လျှို့ဝှက်သင်္ကေတများဖြင့် ကာကွယ်ထားပါ။ ၎င်းသည် သင်၏ အွန်လိုင်းလုံခြုံရေးကိုချိုးဖောက်ရန်အတွက် အလွယ်ဆုံးနည်းလမ်း ဖြစ်သည်။ ဖြစ်နိုင်လျှင် ပိုမိုလုံခြုံမှုရှိစေရန်အတွက် Bluetooth ကိုပါ ပိတ်ထားပါ။ ဖုန်းပျောက်ခြင်း၊ ဖုန်းခိုးခံရခြင်းတို့ကဲ့သို့သော ကိစ္စရပ်များ အတွက် GPS စနစ် သို့မဟုတ် ဖုန်းအသုံးပြု၍မရနိုင်သော အက်ပလီကေးရှင်းများကို ထည့်သွင်းထားပါ။ ကော်ဖီဆိုင်များ၊ ဟော်တယ်များနှင့် အများပြည်သူအသုံးပြုရာ နေရာတော်တော် များများတွင် ရသည့် အခမဲ့အင်တာနက်လိုင်းများသည် လုံခြုံစိတ်ချရမှု မရှိသည်ကို သတိပြုပါ။ အများပြည်သူအသုံးပြုသည့် ကွန်ပျူတာများတွင် ဘဏ်စာရင်းနံပါတ်များ ထည့်သွင်းအသုံးပြုခြင်း ရှောင်ကြဉ်ပါ။ အချက်အလက်များ သို့မဟုတ် လျှို့ဝှက်နံပါတ်များကို မည်သည့်အခါမျှ အလိုအလျောက် သိမ်းဆည်းခြင်းမပြုပါနှင့်။ အသုံးပြုပြီးသည့်အခါတိုင်းလည်း မိမိရှာဖွေခဲ့သည့် အချက်အလက်များ စာရင်းကို ဖျက်ပစ်ပါ။ ဖြစ်နိုင်ပါက လျှို့ဝှက်နံပါတ်များ၊ အသုံးပြုခဲ့သည့် စာရင်းများ သို့မဟုတ် အင်တာနက်ကွတ်ကီးများကို သိမ်းဆည်းမထားမည့် ကိုယ်ပိုင်အင်တာနက်ရှာဖွေခြင်း စာမျက်နှာကို သုံးစွဲပါ။  

ခရီးသွားရန် ပြင်ဆင်ခြင်း
ခရီးမသွားခင် ပြုလုပ်ရမည့်အရေးကြီးသောအချက်များမှာ အောက်ပါအတိုင်းဖြစ်သည်။ တန်ဖိုးရှိသည့် မည်သည့် အချက်အလက်များကိုမဆို အိမ်တွင် သော့ခတ်သိမ်းဆည်းပါ။ သင်၏ စာများကို ထိန်းသိမ်းထားရန်အတွက် စာတိုက်ကို အကြောင်းကြားပါ။ သင်ခရီးမှ ပြန်လာသည့်အခါ စာများကို သင်ကိုယ်တိုင် လာရောက်ယူမည်ဖြစ်ကြောင်းစီစဉ်ပါ။ ခရီးသွားမည့် အချိန်ရောက်သည့်အခါ သင်၏ ကတ်နံပါတ်များ သို့မဟုတ် ငွေကြေးဆိုင်ရာအကောင့်နံပါတ်များပါသည့် မည်သည့်ပစ္စည်းကိုမဆို အစစ်ဆေးခံမည့် ခရီးဆောင်အိတ်တွင်မပါဝင်ပါစေနှင့်။ လေယာဉ်ပေါ်တွင်ဖြစ်စေ၊ လေဆိပ်တွင်ဖြစ်စေ ငွေပေးချေသည့်အခါ သင်၏ ကတ်နှင့်ပတ်သက်သည့် အချက်အလက်များကို အခြားခရီးသွားများမှ မမြင်စေအောင်ဆောင်ရွက်ပါ။ သင်သွားလိုသည့် နေရာရောက်သည့်အခါ လပ်တော့ပ်များ၊ နိုင်ငံကူးလက်မှတ်များနှင့် အခြားကိုယ်ရေးကိုယ်တာနှင့်ငွေကြေးအချက်အလက်များပါသည့် စာရွက်စာတမ်းများကဲ့သို့ တန်ဖိုးရှိသောပစ္စည်းများအားလုံးကို ဟိုတယ်တွင်ရှိသည့် မီးခံသေတ္တာထဲတွင် လုံခြုံစွာ သော့ခတ် သိမ်းဆည်းပါ။

အထက်ဖော်ပြပါအချက်များသည် ရိုးရှင်းသော်လည်း အားလုံးကို သေချာစွာလိုက်နာကျင့်သုံးပါက နိုင်ငံရပ်ခြားခရီးသွားသည့်အခါ အမှန်တကယ်လုံခြုံစိတ်ရမှုများကို ဖြစ်စေပါသည်။ ဤအချက်များကို သင်ကိုယ်တိုင်အတွက်သာမကဘဲ သင့်မိသားစုဝင်များအတွက်ပါ ကျင့်သုံးပါ။ သို့မှသာ သင့်ကိုယ်ရေးကိုယ်တာလုံခြုံရေးအတွက် စိတ်ပူစရာမလိုဘဲ ပျော်ရွှင်စွာခရီးသွားနိုင်မည်ဖြစ်သည်။ 

မျှဝေမည်