အကြွေးဝယ်ယူခြင်းဆိုင်ရာ အခြေခံအချက်များ

အကြွေးဝယ်ခွင့်ကတ် (Credit card) များနှင့်စပ်လျဉ်း၍ အောက်ပါအသုံးအနှုန်း ၁၀ ခုကို သိရှိထားသင့်သည်။

• ၁။ နှစ်စဉ်ကြေး – အကြွေးဝယ်ခွင့်ကတ်(Credit card)ကို အသုံးပြုခြင်းအတွက် တစ်နှစ်လျှင်တစ်ကြိမ်ပေးချေရမည့် ကျသင့်ငွေဖြစ်သည်။ အကြွေးဝယ်ကတ်(Credit card)ထုတ်လုပ်သူတချို့သည် နှစ်စဉ်ကြေးမကောက်ခံပါ။
• ၂။ နှစ်စဉ်အတိုးရာခိုင်နှုန်း – အကြွေးဝယ်ခွင့်ကတ်၏ လက်ကျန်ငွေအပေါ် ကောက်ခံသည့် နှစ်စဉ်အတိုးနှုန်း ဖြစ်သည်။
• ၃။ လက်ကျန်ငွေ – ငွေပမာဏတစ်ခု ဖြစ်သည်။ ပုံမှန် ဘဏ်လုပ်ငန်းဝန်ဆောင်မှုတွင် လက်ကျန်ငွေဆိုသည်မှာ စာရင်းသေအပ်ငွေ သို့မဟုတ် စာရင်းရှင်အပ်ငွေ ဘဏ်စာရင်း၏ လက်ကျန်ငွေပမာဏကို ရည်ညွှန်းသည်။ အကြွေးဝယ်ယူခြင်းတွင်မူ လက်ကျန်ငွေဆိုသည်မှာ ပေးဆပ်ရန်ကျန်ရှိသည့်ငွေပမာဏကို ဆိုလိုသည်။
• ၄။ ကြွေးမြီအချက်အလက် အစီရင်ခံအဖွဲ့အစည်း – သုံးစွဲသူ၏ကြွေးမြီအသုံးပြုမှုဆိုင်ရာ အချက်အလက်များကို စုဆောင်းအစီရင်ခံသည့် အေဂျင်စီဖြစ်သည်။
• ၅။ ကြွေးမြီပမာဏကန့်သတ်ချက် – အကြွေးဝယ်ခွင့်ကတ် (Credit card)ဘဏ်စာရင်းတစ်ခုတွင် အများဆုံးရယူသုံးစွဲနိုင်မည့် ငွေပမာဏဖြစ်သည်။
• ၆။ ကြွေးမြီဆိုင်ရာအဆင့် သတ်မှတ်ချက် – လူတစ်ဦးချင်းစီ၏ ကြွေးမြီစီမံခန့်ခွဲနိုင်စွမ်းအပေါ် ဘဏ္ဍာရေးဆိုင်ရာအဖွဲ့အစည်းတစ်ခုမှ အကဲဖြတ်ချက်ဖြစ်သည်။ ငွေချေးယူရန်ဖြစ်စေ၊ အကြွေးဝယ်ခွင့်ကတ် (Credit card) (သို့) ချေးငွေတစ်ရပ်လျှောက်ထားရန်ဖြစ်စေ ကြွေးမြီဆိုင်ရာအဆင့် သတ်မှတ်ချက်ကောင်းတစ်ခုရရှိရန် အရေးကြီးပါသည်။
• ၇။ သက်ညှာကာလ – ငွေချေးယူသူအနေဖြင့် ငွေပြန်လည်ပေးဆပ်ရန် သတ်မှတ်ကာလကျော်လွန်နေသော်လည်း အတိုး (သို့) နောက်ကျကြေး ပေးဆောင်ရန်မလိုအပ်သေးသည့် သက်ညှာထားသော အချိန်ကာလတစ်ခုဖြစ်သည်။
• ၈။ ကနဦးအတိုးနှုန်းထား – အကြွေးဝယ်ခွင့်ကတ် (Credit card)ထုတ်လုပ်သူများက ချေးငွေတစ်ရပ်ထုတ်ပေးထားသည့် ကနဦးအချိန်ကာလအတွင်း ကောက်ခံသော အတိုးနှုန်းထားတစ်ခုဖြစ်သည်။ ကတ်ကိုင်ဆောင်လိုသူများကို ဆွဲဆောင်သည့်အနေဖြင့် ဤအတိုးနှုန်းထားများကို ပုံမှန်အတိုးနှုန်းထားများထက် လျှော့ချထားတတ်သည်။ ကနဦးအတိုးနှုန်းထားကို မည်သည့်အချိန်ကာလအထိ ရယူနိုင်မည်ဆိုသည်နှင့် ၎င်းအချိန်ကာလနောက်ပိုင်းတွင် ပုံမှန်အတိုးနှုန်းထား မည်မျှပေးရမည်ဆိုသည်တို့ကို သိရှိအောင်ပြုလုပ်ထားသင့်သည်။
• ၉။ အနိမ့်ဆုံးပေးသွင်းရန်ငွေ – မိမိ၏ဘဏ်စာရင်းကို ကောင်းမွန်သောအခြေအနေတစ်ရပ်တွင် တည်ရှိစေရန်အတွက် အကြွေးဝယ်ခွင့်ကတ်(Credit card)၏ ငွေစာရင်းရှင်းတမ်းအရ လစဉ်ပေးချေရန်လိုအပ်သည့် အနိမ့်ဆုံးငွေပမာဏဖြစ်သည်။
• ၁၀။ သတ်မှတ်အတိုင်းအတာထက် ပိုမိုထုတ်ယူခြင်းမှ ကာကွယ်ခြင်း – သင်၏ စာရင်းရှင်ဘဏ်စာရင်းကို အကြွေးဝယ်ခွင့်ကတ် (Credit card)ဖြင့် ချိတ်ဆက်ထားနိုင်မည့် ဘဏ်လုပ်ငန်းဝန်ဆောင်မှုဖြစ်သည်။ ဤသို့ချိတ်ဆက်ထားခြင်းအားဖြင့် ငွေမလုံလောက်အချိန်မျိုးတွင် သတ်မှတ်အတိုင်းအတာထက် ငွေပိုမိုထုတ်ယူမိခြင်းကြောင့် ဒဏ်ငွေပေးဆောင်ရခြင်းများ (သို့) ချက်လက်မှတ် ငြင်းပယ်ခံရခြင်းများမှ ကင်းဝေးနိုင်မည်ဖြစ်သည်။  

အကြွေးဝယ်ယူခြင်း၏ ကောင်းကျိုး၊ ဆိုးကျိုးများ
အကြွေးဝယ်ခွင့်ကတ် (Credit card) များကို အကောင်းဆုံးအသုံးချနိုင်ရန်၊ အကြွေးဆပ်နိုင်စွမ်းရည်ကိုထိန်းသိမ်းရန်အတွက် ကတ်အသုံးပြုမှု၏ကောင်းကျိုး၊ ဆိုးကျိုးများကို နားလည်ထားရန်အရေးကြီးသည်။ ဤကောင်းကျိုး၊ ဆိုးကျိုးများကို သိရှိထားခြင်းအားဖြင့် အကျိုးခံစားခွင့် များနိုင်သမျှများကာ၊ မလိုလားအပ်သောစရိတ်စကများလည်း နည်းနိုင်သမျှနည်းအောင် ချိန်ညှိနိုင်မည်ဖြစ်သည်။

အားသာချက်များ

• လွယ်ကူမြန်ဆန်စွာဝယ်ယူနိုင်စွမ်း – အကြွေးဝယ်ယူခြင်းအားဖြင့် မျှော်လင့်မထားဘဲ ငွေကြေးသုံးစွဲရခြင်းများမှ ကင်းဝေးနိုင်စေမည့်အပြင် ငွေပေးချေမှုကိုလည်း အချိန်ယူပေးဆပ်နိုင်မည့် အခွင့်အရေးရှိသည်။
• လုံခြုံမှု – ငွေသားပျောက်ဆုံးသွားပါက ပြန်ရနိုင်မည့် အခွင့်အလမ်းမရှိပါ။ အကြွေးဝယ်ခွင့်ကတ်(Credit card) ပျောက်ဆုံးသွားပါက အများအားဖြင့် ငွေဆုံးရှုံးခြင်းမရှိဘဲ ၎င်းကတ်ကို ဖျက်သိမ်းနိုင်သည်။ ကတ်ပျောက်ဆုံးမှု သို့မဟုတ် ခိုးယူခံရမှုဖြစ်ပွားပါကလည်း ကတ်ကိုတရားမဝင်သုံးစွဲခံရခြင်းမှ ကာကွယ်ရန် အလျင်အမြန် သတင်းပေးတိုင်ကြားရန် လိုအပ်ပါသည်။
• မှတ်တမ်းထားရှိခြင်း – အကြွေးဝယ်ခွင့်ကတ်(Credit card) မှတ်တမ်းတွင် မိမိ၏လစဉ်အသုံးစရိတ်များအားလုံးကို အမျိုးအစားအလိုက် စာရင်းပြုစုထားခြင်းဖြစ်သဖြင့် ငွေစာရင်းရေးဆွဲရာ၌ များစွာအထောက်အကူပြုပါသည်။
• အဆင်ပြေချောမွေ့မှု – ချက်လက်မှတ်များနှင့် ယှဉ်လျှင် အကြွေးဝယ်ခွင့်ကတ် (Credit card)များကို ငွေပေးချေမှုပုံစံတစ်မျိုးအဖြစ် ပိုမိုလက်ခံကြပြီး အသုံးပြုရာတွင်လည်း ပိုမိုမြန်ဆန်သည်။  
• •ငွေပေးဆောင်မှုကို တစ်စုတစ်စည်းတည်းဖြစ်စေခြင်း – အကြွေးဝယ်ခွင့်ကတ် (Credit card)အသုံးပြုခြင်းအားဖြင့် ငွေပေးဆောင်မှုများကို အလိုလျောက်ပြုလုပ်နိုင်ကာ  အမျိုးမျိုးသော ငွေပေးချေထားမှုများကိုလည်း  တစ်စုတစ်စည်းတည်း စုပေါင်းထားသည့် လုံးပေါင်းငွေတစ်ရပ်အဖြစ် ပေးဆပ်နိုင်သည်။
• အကျိုးခံစားခွင့်များ – အကျိုးခံစားခွင့်ပါဝင်သော အကြွေးဝယ်ခွင့်ကတ် (Credit card)များကို အသုံးပြုခြင်းဖြင့် အခမဲ့ ခရီးသွားလာခွင့်မျိုးကဲ့သို့ အခွင့်အရေးများရရှိနိုင်သည်။

အားနည်းချက်များ
အကြွေးဝယ်ခွင့်ကတ် (Credit card)အသုံးပြုခြင်း၏ အဓိကအားနည်းချက်မှာ အတိုးနှင့် အခွန်အခစရိတ်များ တိုးပွါးလာနိုင်ချေရှိခြင်းဖြစ်သည်။ ကြွေးမြီကို ပါးနပ်စွာအသုံးပြုနိုင်ရန်အတွက် ၎င်းစရိတ်များကို လေ့လာသိရှိထားကာ သင့်လျှော်သလို ဆောင်ရွက်ရန်လိုအပ်သည်။ အကြွေးဝယ်ခွင့်ကတ် (Credit card)အတွက် လစဉ်ငွေပေးဆောင်ရန် အချိန်ကျသည့်အခါတွင် အပြည့်အဝငွေပေးချေနိုင်ရေးအတွက် မိမိ၏ငွေသုံးစွဲမှုများကို မှတ်သားထားရန်လိုအပ်သည်။