ငွေကြေးစုဆောင်းခြင်းသည် အမြဲတစ်စေ ခက်ခဲသည့်အလုပ် မဟုတ်ပါ။ ရရှိသောဝင်ငွေ သို့မဟုတ် ထောက်ပံ့ငွေတစ်ခုမှငွေကို စုငွေစာရင်းတွင် လွဲပြောင်းအပ်နှံထားခြင်းဖြင့် စုဆောင်းငွေများကို လွယ်ကူစွာ အင်အားစိုက်ထုတ်ရခြင်းမရှိဘဲ တိုးပွားစေနိုင်ပါသည်။ ငွေစာရင်း ဖွင့်လှစ်ခြင်းနှင့် ဘဏ္ဍာရေးဆိုင်ရာအဖွဲ့အစည်းတွင် ငွေသွင်းအပ်ခြင်းဖြင့် သင်၏ စုဆောင်းငွေသည် သတ်မှတ်ရာခိုင်နှုန်းအလိုက် နှစ်စဉ် တိုးပွားနေမည် ဖြစ်သည်။ အဆိုပါ ရာခိုင်နှုန်းကို အတိုးဟု ခေါ်သည်။ စုဆောင်းငွေကို ထုတ်ယူခြင်းမရှိဘဲ အချိန်ကြာမြင့်စွာထားရှိနိုင်လေ စုဆောင်းငွေပိုမိုများပြားလာလေဖြစ်သည်။
သင့်ငွေကြေးကို တိုးပွားစေခြင်း
သင်၏ ငွေကြေးကို တိုးပွားစေမည့် နည်းလမ်းအမျိုးမျိုး ရှိပါသည်။ ထပ်ဆင့်အတိုး၊ စည်းမျဉ်း ၇၂ နှင့် ဘဏ္ဍာရေးဆိုင်ရာအဖွဲ့အစည်းများ၏ စာရွက်စာတမ်းများကို အသေးစိတ် ပြန်လည်စစ်ဆေးခြင်းသည် သင်၏ စုဆောင်းငွေများကို လွယ်လင့်တကူ တိုးပွားစေနိုင်သည့် နည်းလမ်းအနည်းငယ်ဖြစ်သည်။ ခဲခဲယဉ်းယဉ်း ရရှိထားသော သင်၏ အတိုးငွေများကို ဒဏ်ကြေးများနှင့် ဘဏ္ဍာရေးအဖွဲ့အစည်းများ၏ ဝန်ဆောင်ခများကြောင့် အဆုံးရှုံးမခံပါနှင့်။ ငွေစာရင်း ဖွင့်လှစ်ခြင်းမပြုမီ ဝန်ဆောင်ခများအကြောင်း၊ အခကြေးငွေများ၊ ဒဏ်ကြေးများ၊ အတိုး ကန့်သတ်ချက်များနှင့် ပြောင်းလဲတတ်သော အတိုးနှုန်းများကြောင်းများကို သေချာစွာ အသေးစိတ်သိရှိထားပါ။ အတိုးနှင့် ငွေစုစာရင်းများ မည်ကဲ့သို့ အလုပ်လုပ်ဆောင်သည်ကို နားလည်ထားခြင်းဖြင့် သင်၏ ငွေကြေးကို စီမံခန့်ခွဲရာတွင် ရဲဝံ့စွာ ဆုံးဖြတ်ချက်များ ချမှတ်နိုင်ပါလိမ့်မည်။
အတိုးသည် သင့်အတွက် ကြွယ်ဝမှုကို တည်ဆောက်ပေးနိုင်ပါသည်။ ဥပမာ- အကယ်၍ သင်သည် ကျပ် ၁၀၀ ကို အတိုး ၆ ရာခိုင်နှုန်းပေးသော စုဆောင်းငွေစာရင်းတွင် ထည့်ထားမည်ဆိုပါက နှစ်ကုန်တွင် ကျပ် ၁၀၆ သို့ တိုးပွားလာမည် ဖြစ်သည်။ Compound interest (ထပ်ဆင့်အတိုး) သည် အတိုးငွေပေါ်တွင် ထပ်မံအတိုးငွေ ပေါင်းထည့်ပေးခြင်းဖြင့် စုဆောင်းငွေတိုးပွားလာသည်။ ထပ်ဆင့်အတိုး ပထမနှစ်အပြီး ကျပ် ၁၀၆ အပေါ် ၆ ရာခိုင်နှုန်း အတိုးပေးခြင်းဖြင့် နောက်နှစ်တွင် ကျပ် ၆ ဒဿမ ၃၆ သို့မဟုတ် ၃၆ ပြား ပိုမိုရရှိလာမည်ဖြစ်သည်။ လက်ရှိငွေပေါ် ထပ်မံပေါင်းထည့်ခြင်းဖြင့် စုစုပေါင်း ကျပ် ၁၁၂ ဒဿမ ၃၆ အထိရရှိလာမည်ဖြစ်သည်။ အကယ်၍သင်သည် ၆ ရာခိုင်နှုန်း အတိုးရရှိသည့် ငွေစာရင်းတွင် နှစ်ပေါင်း ၄၀ ကြာအောင်ထားရှိပါက ကျပ် ၁၀၂၈ အထိတိုးပွားလာမည်ဖြစ်ရာ နဂိုမူလအပ်နှံငွေပမာဏာထက် ဆယ်ဆကျော် ရှိလာမည်ဖြစ်သည်။
စည်းမျဉ်း ၇၂
သင်၏ ငွေကြေးကို နှစ်ဆ တိုးမြှင့်လိုပါသလား။ ဂဏန်းသင်္ချာ ဆိုင်ရာ တွက်ချက်နည်းဖြစ်သည့် စည်းမျဉ်း ၇၂ ကို အသုံးပြုကာ သင်၏ ငွေကြေး တိုးပွားလာရန် အချိန်မည်မျှကြာမည်ဆိုသည်ကို တွက်ချက်ပါ။ ပထမဦးစွာ ၇၂ ကို သင့်ငွေစာရင်း၏ နှစ်စဉ်ပုံသေအတိုးနှုန်းဖြင့် စားလိုက်ပါ။ ဥပမာ အကယ်၍ အတိုးနှုန်းသည် ၆ ရာခိုင်နှုန်းဖြစ်ပါက ၇၂ ကို ၆ ဖြင့် စားလိုက်ပါ။ ဤနှုန်းထားဖြင့် သင်၏ ငွေကြေးနှစ်ဆဖြစ်ရန် ၁၂ နှစ်ကြာမြင့်မည်။ သင့်အနေဖြင့် ငွေကြေးဆိုင်ရာရည်မှန်းချက်များကို စဉ်းစားမည်ဆိုပါက စည်းမျဉ်း၇၂ ဖြစ်သည်
အချိန်နှင့်အမျှ စုဆောင်းထားငွေအပေါ် အကျိုးသက်ရောက်မှုရှိစေပြီး၊ သင့်အနေဖြင့် ဆုံးဖြတ်ချက်များချမှတ်ရာတွင်လည်း အထောက်အကူများစွာ ဖြစ်ပေလိမ့်မည်။
ငွေစုဆောင်းရန် အချက်များ
- စုဆောင်းခြင်းကို ပထမဦးစားပေးအဖြစ်လုပ်ဆောင်ပါ။ ဝင်ငွေရလာသည့် အခါတိုင်း စုဆောင်းရန်အတွက် သီးသန့်ဖယ်ထားပါ။ နည်းသည်ဖြစ်စေ များသည်ဖြစ်စေ လစဉ် ငွေကြေးစုဆောင်းခြင်းသည် ကောင်းမွန်သော အလေ့အကျင့်တစ်ခုဖြစ်သည်။
- အလိုအလျောက် စုဆောင်းငွေစာရင်း ဖြစ်ပါစေ။ ဘဏ္ဍာရေးဆိုင်ရာ အဖွဲ့အစည်းအများစုသည် Online သို့မဟုတ် မိုဘိုင်းဖုန်းအက်ပလီကေးရှင်းမှတစ်ဆင့် အလိုအလျောက် စုဆောင်းငွေလွဲခြင်း၊ ပမာဏစစ်ဆေးခြင်းများ ပြုလုပ်ခွင့်ပေးသည်။
- စုဆောင်းရန် ငွေကို ထားပါ။ တစ်ပတ်အတွင်း သုံးစွဲခဲ့သောအရာအားလုံးကို စာရင်းပြုစုကြည့်ပါက သင် မည်သို့ သုံးစွဲသွားသည်ကို အံသြဖွယ်ရာတွေ့မြင်ရမည်။ သုံးစွဲတတ်သည့် အလေ့အကျင့်များကို အနည်းငယ် ပြုပြင်ပြောင်းလဲလိုက်ရုံဖြင့် သင် ချက်ချင်းစုဆောင်းနိုင်ပါလိမ့်မည်။
- ငွေအကြွေများကို သိမ်းဆည်းပါ။ အချို့စူပါမားကတ်များသည် သင့်၏ ငွေအကြွေများကို မှတ်ထားတွက်ချက်ကာ ဝန်ဆောင်ခ အနည်းငယ်ဖြင့် ငွေသား ပြန်လည်ပေးအပ်သော စက်များရှိပါသည်။ သင်၏ အပိုငွေများကို စုဆောင်းကာ အိပ်ငယ်တစ်ခုအတွင်း ထည့်သွင်းသိမ်းဆည်းထားကာ မည်မျှတိုးပွားလာသည်ကို ကြည့်ပါ။ ချက်ချင်းသုံးပစ်လိုက်မည့်အစား အပိုရငွေအဖြစ် စုဆောင်းငွေထဲသို့ ထည့်သွင်းရန် စဉ်းစားပါ။
- အပိုကုန်ကျစရိတ်များကို လျော့ပါ။ အမှန်တစ်ကယ် အသုံးပြုခြင်း မရှိဘဲနှင့် ပေးသွင်းထားရသော လစဉ်ကြေးများ ရှိ၊ မရှိ ပြန်လည် စစ်ဆေး ကြည့်ပါ။ ဥပမာ-အားကစားရုံ၊ မဂ္ဂဇင်း သို့မဟုတ် အင်တာနက်၊ TV လိုင်း အသုံးပြုခများ ဖြစ်နိုင်ပါသည်။ ထိုသို့ အသုံးမလိုတော့သည့်ဝန်ဆောင်မှုများသည် တစ်နှစ်လျှင် ဒေါ်လာရာနှင့်ချီ၍ ကုန်ကျနိုင်ပါသည်။
မျှဝေမည်
မျှဝေမည်