အနာဂတ်တွင် ဘာဖြစ်မည်ကို သေချာပေါက် မပြောနိုင်သော်လည်း စိတ်ထဲတွင် အမြဲတွေးလျက် မမျှော်လင့်သော ကုန်ကျစရိတ်များအတွက် သင်သည် ကြိုတင်ပြင်ဆင်နိုင်သည်။ အဓိကကျသော ဘဝဖြစ်ရပ်များကို အောင်မြင်စွာ စီမံခန့်ခွဲနိုင်ရေးအတွက် ငွေကြေးဆိုင်ရာစိတ်ချရမှုမှာ အရေးကြီးသည်။ မမျှော်လင့်သောဖြစ်ရပ်များကို ကိုင်တွယ်ဖြေရှင်းရန်အတွက် ကျွန်ုပ်တို့သည် ငွေရေးကြေးရေးအရ ပြင်ဆင်ထားပြီး ဖြစ်နေရမည်။
မမျှော်လင့်သော ကုန်ကျစရိတ်များ
အိမ်အသုံးအဆောင်ပစ္စည်း ပြင်ဆင်ခြင်းမှစ၍ အဓိက ကျန်းမာရေးစရိတ်များအထိ မျှော်လင့်မထားသောကုန်ကျစရိတ် အမျိုးမျိုးရှိသည်။ ယင်းတို့မှာ ကုန်ကျစရိတ်ကြီးမားနိုင်ပြီး သင့်တွင် အရေးပေါ်စုဆောင်းငွေ တစ်ခုခု မရှိထားပါက ငွေကြေးအခက်အခဲ တွေ့ကြုံရနိုင်သည်။ သင်၏ လစဉ်ဝင်ငွေထဲမှ တစ်ချို့တစ်ဝက်ကို ဘဏ်၌ စုဆောင်းခြင်း သို့မဟုတ် ငွေသားအတိုင်းစုဆောင်းခြင်းများ ဆောင်ရွက်နိုင်သည်။ သို့မှသာ အရေးပေါ်ငွေလိုအပ်ပါက အသုံးပြုနိုင်မည်ဖြစ်သည်။
ငွေစုဘဏ်စာရင်းတွင် စုဆောင်းမည်ဆိုပါက လိုအပ်သောအချိန်တွင် ထုတ်ယူနိုင်စေရန် ဆောင်ရွက်ပါ။ ကံကောင်းလျှင် လိုအပ်မည် မဟုတ်သော်လည်း၊ သင် လိုအပ်မည်ဆိုပါကလည်း အရေးပေါ်ငွေကို လွယ်လင့်တကူ ရနိုင်သဖြင့် သင့်အတွက် အလွန်အဆင်ပြေမည်။
ကျန်းမာရေးစောင့်ရှောက်မှု စရိတ်များ
မိမိကိုယ်ကို ဂရုစိုက်နေသော်ငြား၊ ကျန်းမာရေးနှင့်ညီသည့် လူနေမှုပုံစံအတိုင်း နေထိုင်နေသော်ငြားလည်း၊ မည်သည့်အချိန်၌ ဖျားနာမည်ကို မည်သည့်အခါမျှ ကြိုတင် မသိနိုင်ပေ။ ကျန်းမာရေးပြဿနာတစ်ခုခုကို ရင်ဆိုင်လာရ၍ စောင့်ရှောက်မှုခံယူရသည့်အခါ မိမိ၏နိစ္စဓူဝ ကုန်ကျစရိတ်ထဲက ကျခံကောင်းကျခံနိုင်မည် သို့မဟုတ် မိမိ၏ စုဆောင်းငွေ၊ ဝင်ငွေ အားလုံးကုန်ခမ်းကောင်း ကုန်ခမ်းသွားနိုင်မည် ဖြစ်သည်။ သို့ဖြစ်၍ ကျန်းမာရေး အာမခံမရှိပါက မိမိလိုအပ်သည်နှင့်တပြိုင်နက် ကုသမှုခံယူနိုင်ရန် အရေးပေါ်စုဆောင်းငွေ ထားရှိရန် အရေးကြီးသည်။
စုဆောင်းငွေ မည်သို့ တိုးပွားလာသနည်း။
ငွေစုဘဏ်စာရင်းဖွင့်ခြင်းမှာ ငွေသားစုဆောင်းခြင်းထက် ပိုမိုစိတ်ချလုံခြုံရသော နည်းလမ်းဖြစ်သည်ဆိုသည်မှာ အသေအချာပင် ဖြစ်သည်။ သို့သော် နောက်ထပ်အကြောင်းရင်းတစ်ခုမှာ ဘဏ်များက စုငွေအပေါ် အတိုးပေးသဖြင့် သင့်စုငွေမှာ ရင်းနှီးမြှုပ်နှံမှုတစ်ခုလည်း ဖြစ်နေသည်။ အခြား ရင်းနှီးမြှုပ်နှံမှုနည်းလမ်းများ ရှိသော်လည်း ငွေစုဘဏ်စာရင်းဖွင့်ခြင်းမှာ အလွယ်ကူဆုံးနှင့် လက်လှမ်းအမီဆုံး ရင်းနှီးမြှုပ်နှံမှုနည်းလမ်း ဖြစ်သည်။
မျှဝေမည်
မျှဝေမည်
