ငွေစာရင်းရေးဆွဲခြင်း

ပထမအဆင့်အနေဖြင့် မည်မျှငွေဝင်နိုင်မည်၊ မည်မျှသုံးစွဲမည်ကို ချိန်ဆနိုင်ရန်အတွက် သင်၏ ဝင်ငွေနှင့် အသုံးစရိတ်ကို ချင့်ချိန်ပြီး ငွေစာရင်းတစ်ခုရေးဆွဲရန်ဖြစ်သည်။

သင်၏ လက်ရှိငွေစာရင်းကို ရှင်းလင်းစွာ နားလည်သဘောပေါက်သည့်အခါမှ မည်သည့်နေရာတွင် အသုံးစရိတ်များ လျှော့ချနိုင်မည် (သို့မဟုတ် ဝင်ငွေပိုမိုရရှိနိုင်သည်) အစရှိသည်တို့ကို ချင့်ချိန်နိုင်ပြီး လုံလောက်စွာ မျှော်လင့်ထားသည့်အတိုင်း စီမံဆောင်ရွက်နိုင်မည်။ကျွန်ုပ်တို့၏ ငွေစာရင်းဇယားကို အသုံးပြု၍ အောက်ဖော်ပြပါအချက်များအတိုင်း လုပ်ဆောင်ပါ။  

၁။ သင်၏လိုအပ်ချက်နှင့် လိုလားချက်များကို မေးခွန်းထုတ်ပါ။
သင် ဘာလိုချင်ပါသနည်း။ သင် အမှန်တစ်ကယ် ဘာလိုအပ်ပါသနည်း။ သင်၏ လက်ရှိ ငွေကြေးအခြေအနေကို သုံးသပ်ကာ စာရင်းနှစ်ခုပြုစုပါ။ တစ်ခုမှာ လိုအပ်ချက်များဖြစ်ပြီး နောက်တစ်ခုမှာ လိုလားချက်များဖြစ်သည်။ စာရင်းကို ပြုစုသည့်အခါ အောက်ပါအကြောင်းအရာများကို မိမိကိုယ်မိမိ မေးခွန်းထုတ်ပါ။

• မိမိ ဘာကြောင့်လိုချင်ပါသနည်း။
• အကယ်၍ လိုချင်သည့်အရာများရရှိခဲ့ပါက မိမိအတွက် မည်ကဲ့သို့ပြောင်းလဲသွားမည်နည်း။
• မည်သည့်အရာသည် မိမိအတွက် အရေးကြီးပြီး မရှိမဖြစ်အရေးပါသနည်း။

သင်စာရင်းပြုစုပြီးပါက ငွေစာရင်းအပေါ် အကျိုးသက်ရောက်မှုရှိမည့် ဝယ်ယူမှုများမပြုမီ ဝယ်ယူမည့်ပစ္စည်းသည် မိမိအတွက် အမှန်တကယ်ပင် လိုအပ်ခြင်းရှိမရှိ ဆန်းစစ်ပါ။

၂။ လမ်းညွှန်ချက်များကို ချမှတ်ပါ။
မိမိ၏ငွေစာရင်းကို ရှင်းလင်းသော လမ်းညွှန်ချက်များချမှတ်ကာ လိုအပ်ချက်များ၊ တောင့်တချက်များဖြင့် ချိန်ဆထားပါ။  အကယ်၍ သင်သည် အပန်းဖြေခရီးအတွက် ငွေအမြောက်အမြားသုံးစွဲမည်ဆိုပါက အဆိုပါအသုံးစရိတ်ကို ပြန်ထေနိုင်ရန်အတွက် အခြားကုန်ကျစရိတ်များကိုလျှော့ချရန် စဉ်းစားသင့်ပါသည်။ ဖော်ပြပါ (ငွေစာရင်းဇယား)ကို ကြည့်ရှုကာ အမျိုးမျိုးသောအသုံးစရိတ်များအတွက် မည်သို့ခွဲဝေသုံးစွဲရမည်ကို သိရှိနားလည်ပါလိမ့်မည်။

မှတ်တမ်းပြုစုပါ၊ လျှော့ချပါ၊ ရည်မှန်းချက်ထားပါ။
အသုံးစရိတ်များကို မှတ်တမ်းပြုစုထားပါက တစ်လအတွင်း ပြင်ပစားသောက်ဆိုင်များ၊ ဖျော်ဖြေရေးပွဲများနှင့် အခြားကိစ္စများရပ်အတွက် ကျပ်သောင်းသိန်းရာနှင့်ချီ၍ သုံးစွဲထားသည်ကို အံသြစွာတွေ့ရမည်ဖြစ်သည်။ အဆိုပါ ကုန်ကျစရိတ်များကို လျှော့ချနိုင်သလောက် လျှော့ချပါ။ လုံးဝသုံးစွဲခြင်းမရှိဘဲ ထိန်းချုပ်ထားခြင်းထက် လျှော့ချသုံးစွဲခြင်းသည် ပိုမို၍ လက်တွေ့ကျကြောင်း သတိပြုပါ။