သင်၏ ဘဏ္ဍာရေးကို အကဲဖြတ်ခြင်း

လစဉ် ငွေစာရင်းရေးဆွဲခြင်း

• ၁။ ဝင်ငွေအားလုံးကို ပေါင်းထည့်ပါ။      လစဉ်ငွေစာရင်းတစ်ခုကို ရေးဆွဲရန်အတွက် လစာငွေများ၊ အတိုးများ၊ ပင်စင်ငွေနှင့် မိမိအိမ်ထောင်ဖက်၏ ဝင်ငွေကဲ့သို့သော အခြားဝင်ငွေများအပါအဝင် လစဉ်ရရှိနိုင်မည့်ဝင်ငွေများကို စာရင်းပြုစုခြင်းအားဖြင့် သင့်၌ ဝင်ငွေ မည်မျှရှိသည်ကို ပထမဦးဆုံး ဆုံးဖြတ်ရမည်ဖြစ်သည်။ အကယ်၍ သင်သည် ပုံမှန်လစာငွေရရှိသူဖြစ်ပါက အသားတင်ရမည့်ငွေကိုသာ စာရင်းပြုရပါမည်။ လစာတွင် အခွန်ငွေမဖြတ်ရသေးပါက ထိုပေးရမည့်အခွန်ကို အသုံးစရိတ်တစ်ခုအဖြစ် မှတ်သားထားပါ။
• ၂။ အသုံးစရိတ်များကို ခန့်မှန်းတွက်ချက်ပါ။       အကောင်းဆုံးနည်းလမ်းမှာ တစ်လအတွင်း မည်မျှသုံးစွဲသည်ကို မှတ်သားထားရန်ဖြစ်သည်။ မိမိ၏  အသုံးစရိတ်ကို လွယ်လင့်တကူ မှတ်ထားနိုင်ရန်အတွက် ဘဏ်ရှိ ငွေစာရင်းမှ ထုတ်သုံးငွေ၊ ပေးဆပ်ရန်ငွေ (အကြွေး) စာရင်းအားလုံးကို ထုတ်ယူကြည့်ရန်နှင့် မိမိဖုန်းဖြင့် ဘောက်ချာများကို ဓာတ်ပုံရိုက်ထားရန် လိုအပ်သည်။ မိမိ၏ အသုံးစရိတ်ကို ပုံသေအသုံးစရိတ်(ဥပမာ အိမ်ငှားခ၊ အာမခံပေးသွင်းငွေများ အစရှိသော တစ်လနှင့် တစ်လ မပြောင်းလဲသည့် ကုန်ကျစရိတ်)နှင့် ပြောင်းလဲနိုင်သော အသုံးစရိတ် (ဥပမာ အစားအသောက်နှင့် အပျော်အပါးကိစ္စများ အစရှိသော ပြောင်းလဲနိုင်သည့် ကုန်ကျစရိတ်များ) ဟူ၍ နှစ်မျိုးခွဲထားပါ။ အကယ်၍ အချို့သောကုန်ကျစရိတ်များသည် လစဉ် ထူးထူးခြားခြားပြောင်းလဲမှုရှိပါက လစဉ်အသုံးစရိတ်ကို သုံးလပေါင်းပျှမ်းမျှကုန်ကျစရိတ်ဖြင့် ခန့်မှန်းတွက်ချက်ပါ။
• ၃။ ခြားနားချက်ကို ဖော်ထုတ်ပါ။       သင်၏ နှစ်စဉ်ဝင်ငွေစုစုပေါင်းမှ ကုန်ကျစရိတ်စုစုပေါင်းကို နုတ်ကြည့်ခြင်းဖြင့် ခြားနားချက်ကို သိရှိနိုင်သည်။ ဤနည်းသည် ရိုးရှင်းစွာဖြင့် သင်၏ သုံးစွဲမှုအလေ့အထများကို ပေါ်လွင်စေမည်ဖြစ်သည်။     အကယ်၍ ခြားနားချက်သည် အပေါင်းလက္ခဏာဖြစ်နေပါက ဂုဏ်ယူလိုက်ပါ။ သင်၏ အသုံးစရိတ်သည် ဝင်ငွေထက်နည်းနေကြောင်း ဖော်ပြနေသည်။      အကယ်၍ အနုတ်လက္ခဏာဖြစ်နေပါက သင်၏အသုံးစရိတ်သည် ဝင်ငွေထက် ပိုများနေပြီဖြစ်ရာ လုံလောက်စွာနေထိုင်နိုင်ရန်အတွက် ခြိုးခြံချွေတာရန် လိုအပ်နေပါပြီ။
• ၄။ မှတ်တမ်း ပြုစုပါ။       ငွေစာရင်းရေးဆွဲခြင်းသည် ပထမအဆင့်သာ ဖြစ်ပါသည်။ ရေးဆွဲထားသောငွေစာရင်းအတိုင်း လိုက်နာသုံးစွဲနိုင်ရန်အတွက် လစဉ်ဝင်ငွေနှင့် အသုံးစရိတ်များအားလုံးကို မှတ်တမ်းတင်ထားပါ။ မိမိအတွက် အဆင်ပြေနိုင်မည့် စာရင်းတစ်ခုတည်ဆောက်ရန် အချိန်အတိုင်းအတာတစ်ခု လိုအပ်ပါလိမ့်မည်။

Budget Worksheet (ငွေစာရင်းဇယား) အသုံးပြုကာ သင့်၏ ဘဏ္ဍာရေးအခြေအနေကို စတင် အကဲဖြတ်ကြည့်လိုက်ပါ။

ငွေစာရင်းရေးဆွဲခြင်းအကြောင်း ဆက်လက်ဖတ်ရှုပါ။

အရေးပေါ်သုံးစွဲရန်အတွက် စုဆောင်းငွေတစ်ရပ်ထားရှိခြင်း
 ငွေစာရင်းကိုရေးဆွဲပြီးနောက် အနာဂတ်အတွက် စုဆောင်းငွေများကို လျော့ပါးမသွားစေဘဲ ထိန်းသိမ်းထားနိုင်ရန်မှာ အရေးကြီးပါသည်။ အရေးပေါ် ပေါက်လာသောအသုံးစရိတ်တစ်ရပ်အတွက် သင့်ထံတွင် အပိုဆောင်းငွေရှိပါသလား။ အရေးပေါ်သုံးစွဲရန်အတွက် သုံးလမှခြောက်လအထိအသုံးစရိတ်နှင့်ညီမျှသော စုဆောင်းငွေတစ်ရပ်ထားရှိခြင်းသည် ခိုင်မာသော ဘဏ္ဍာရေးအခြေခံအုတ်မြစ်တစ်ရပ် တည်ဆောက်ရေးအတွက် သော့ချက်ပင်ဖြစ်သည်။ သင်၏ငွေကြေးကဏ္ဍကို စိစစ်ရေးဆွဲရာတွင် အရေးပေါ်သုံးစွဲရန်အတွက် စုဆောင်းငွေတစ်ရပ်ထားရှိပါ။ သို့မှသာ အမှတ်မထင်ပေါ်ပေါက်လာသော ကုန်ကျစရိတ်များအတွက် ကြိုတင်ပြင်ဆင်ထားရာ ရောက်ပေလိမ့်မည်။ လက်ရှိငွေ တိုးပွားလာစေရန်အတွက် လစဉ်ပုံမှန် စုဆောင်းနိုင်မည့်နည်းလမ်းများကို တွေးတောကြံဆကာ စတင်စုဆောင်းထားသင့်သည်။ စတင်ရန်အတွက် အရေးပေါ်သုံးစွဲရန်အတွက် စုဆောင်းငွေ တွက်ချက်နည်းကို ကြည့်ရှုပါ။

အကြွေးဝန်ထုပ်ကို စီမံခန့်ခွဲပါ။
အကယ်၍ သင့်အနေဖြင့် အိမ်ဝယ်စရိတ်လက်ကျန်အကြွေး သို့မဟုတ် ကျောင်းစရိတ်ချေးငွေတစ်ရပ်ကို ပေးဆပ်ရန် လုပ်ဆောင်နေပါက သင်သည် ချေးငွေများကို မည်ကဲ့သို့ ထိထိရောက်ရောက် ပေးချေနိုင်မည်ဆိုသည်ကို အချိန်ယူ၍ လုပ်ဆောင်ပါ။ ပေးဆပ်ရမည့် ငွေစုစုပေါင်းကိုတွက်ချက်ကာ သုံးသပ်စီမံနိုင်ပါမှ သင်သည် ကြွေးမြီအားလုံးကို ကောင်းမွန်စွာ ကိုင်တွယ်ဖြေရှင်းနိုင်လိမ့်မည်။ အဆိုပါကြွေးမြီများကို လျှော့ချခြင်းသည် သင်၏ ငွေကြေးကဏ္ဍတိုးတက်မှုရှိစေမည့် အရေးကြီးသောခြေလှမ်းတစ်ရပ်ဖြစ်သည်။