အယောင်ဆောင်လိမ်လည်ခိုးယူခံရနိုင်မှုအလားအလာ မြင့်မားခြင်း

သက်ကြီးပိုင်းများသည် အထူးသဖြင့် ၎င်းတို့၏ငွေကြေးများကို စစ်ဆေးကြည့်ရှုခြင်းမပြုလုပ်ပါက အယောင်ဆောင်လိမ်လည် ခိုးယူခြင်းခံရနိုင်ဖွယ် အလားအလာရှိသည်။ သတိပေးချက်လက္ခဏာများကို သတိပြုမိခြင်း၊ လိုအပ်သည့်ကြိုတင်ကာကွယ်မှုများ မည်သို့ပြုလုပ်ရမည်ကိုသိရှိခြင်းနှင့် အကယ်၍ သင်ကိုယ်တိုင်သော်လည်းကောင်း သင့်မိသားစုဝင် တစ်ယောက်ယောက်သော်လည်းကောင်း အယောင်ဆောင် လိမ်လည်ခိုးယူခြင်းခံခဲ့ရပါက အဆင့်ဆင့် မည်သို့လုပ်ဆောင်ရမည်တို့ကို နားလည်ခြင်းသည် လူတစ်ဦးတစ်ယောက်ခြင်း၏ ကိုယ်ပိုင်အချက်အလက်များနှင့် ငွေကြေးပိုင်ဆိုင်မှုများကို ကာကွယ်ခြင်းအတွက် အလွန်ရေးကြီးပါသည်။

ကလေး သို့မဟုတ် သက်ကြီးပိုင်းတစ်ယောက်ယောက်၏ ငွေကြေးလုံခြုံမှုနှင့် ပတ်သက်ပြီး ကူညီစစ်ဆေးပေးရန်အတွက် အချို့အချက်များကို အောက်ပါအတိုင်းဖော်ပြထားပါသည်။

သတိပေးချက်လက္ခဏာများကို သတိပြုပါ။
အကယ်၍ သင်ချစ်ခင်ရသူတစ်ဦးဦးထံ အကြွေးတောင်းခံသည့် ဖုန်းခေါ်ဆိုမှုများ (သို့မဟုတ်) သူအမှန်တကယ်အသုံးမပြုသည့် ဝန်ဆောင်မှုများအတွက် ငွေတောင်းခံလွှာများ ပေးပို့လာပါက ငွေလိမ်ခံရမည့် အဓိကလက္ခဏာများဖြစ်သည်။ အထူးသဖြင့် သက်ကြီးပိုင်းများသည် အွန်လိုင်း သို့မဟုတ် ဖုန်းမှတစ်ဆင့် ငွေလိမ်ခံရနိုင်သည့် အလားအလာများရှိသည်ကို သတိရှိပါ။ အယောင်ဆောင်လိမ်လည်ခြင်းနှင့် သက်ဆိုင်သည့် လက္ခဏာများကိုစောင့်ကြည့်ခြင်းဖြင့် သင်၏ ဆွေမျိုးတစ်ယောက်ယောက် ငွေလိမ်ခံရတော့မည်ဆိုပါက ကြိုတင်သတိပြုမိနိုင်ပါသည်။

သင်၏ ကြွေးမြီအစီရင်ခံစာကို စစ်ဆေးပါ။  
အကြွေးဝယ်ခွင့်ကတ် အကောင့်သစ်စတင်ဖွင့်လိုက်ပြီဆိုသည်နှင့် ကြွေးမြီမှတ်တမ်းတစ်ခု စတင်ပြီဖြစ်သည်။ အယောင်ဆောင် လိမ်လည်ခိုးယူခြင်းလက္ခဏာများကို မြန်နိုင်သမျှ အမြန်ဆုံး သတိပြုမိရန်အတွက် သင့်မိသားစုဝင်များ၏ ကြွေးမြီနှင့်ပတ်သက်၍ ပုံမှန်မဟုတ်သည့် အပြောင်းအလဲများ ရှိ၊ မရှိ သေချာစွာစစ်ဆေးပါ။

အွန်လိုင်းဆောင်ရွက်မှုများကို စောင့်ကြည့်ပါ။
ကလေးများကို အွန်လိုင်းနှင့်ပတ်သက်၍ သတိထားရန်သင်ကြားပေးပါ။ သင်၏ မိဘများအနေဖြင့်လည်း အွန်လိုင်းလုံခြုံရေးအခြေခံအချက်များကို သတိပြုမိပါစေ။ လှည့်ဖျားလိမ်ညာသည့် phishing အီးမေးလ်များကို မည်သို့ ဖျက်ရမည်ကို သိပါစေ။ ၎င်းတို့အနေဖြင့် အွန်လိုင်းတွင် မိမိတင်လိုက်သည့် မည်သည့်သတင်းအချက်အလက်များကိုမဆို သတိပြုမိပါစေ။ လုံခြုံစိတ်ချရသည့် ဝက်ဘ်ဆိုက်များမှသာ ဈေးဝယ်ခြင်း ပြုပါစေ။  phishing အီးမေးလ်များသည် လှည့်ဖျားလိမ်ညာပြီး လူများ၏ လျှို့ဝှက်နံပါတ်၊ အကြွေးဝယ်ကတ်နံပါတ် အစရှိသည့် ကိုယ်ရေးကိုယ်တာအချက်အလက်များကို စိတ်ချယုံကြည်ဖွယ် ကုမ္ပဏီကြီးများ အသွင်ဆောင်ကာ မေးမြန်းတောင်းခံကြသည်။ အကယ်၍ သင်၏ ကလေးများက ငယ်ရွယ်သေးသည်ဆိုပါက သူတို့ကိုယ်တိုင် အွန်လိုင်းကို တာဝန်ရှိရှိ၊ တာဝန်သိသိ သုံးတက်သည့် အချိန်ထိတိုင်အောင် ၎င်းတို့၏ အွန်လိုင်းဆောင်ရွက်မှုများကို အနီးကပ် သေချာစွာ စစ်ဆေးကြည့်ရှုပါ။ မိသားစုဝင်တစ်ယောက်ယောက်က အင်တာနက်ကိုပထမဆုံးစတင်အသုံးပြုသည်ဆိုပါက ပို၍အရေးကြီး ပါသည်။ လုံခြုံစိတ်ချသည့် အင်တာနက်ဆိုသည်ကို သင်ကြားပေးရန် အတွက် အချိန်အနည်းငယ်ယူရမည်ဖြစ်သည်။  

အရေးကြီးသည့် စာရွက်စာတမ်းများကို သိမ်းဆည်းရန်အတွက် လုံခြုံစိတ်ချရသည့်နေရာကို ရှာဖွေပါ။
စာရွက်စာတမ်းများ၊ အီလက်ထရောနစ်မှတ်တမ်းများ၊ ကိုယ်ရေး ကိုယ်တာနှင့် ငွေကြေးအချက်အလက်များကို သိမ်းဆည်းရန်အတွက် နေရာများသတ်မှတ်ထားပါ။ စာတိုက်ပုံးကို လုံခြုံစိတ်ချစွာထားရှိခြင်းနှင့် မကြာခဏဆိုသလိုစစ်ဆေးခြင်းသည်လည်း အရေးကြီးသည့် အချက်အလက်များမဆုံးရှုံးရအောင် ကာကွယ်ပေးနိုင်ပါသည်။ အကယ်၍ စာရွက်စာတမ်းတစ်ခုခုကို အသုံးပြုရန် မလိုအပ်တော့ပါက ဆုတ်ဖြဲပြီးမှသာ လွှင့်ပစ်ပါ။