လူတိုင်းတွင် မိမိစိတ်တိုင်းကျစိတ်ကူးထားသောအိမ်မျိုး ရှိတတ်သည်။ သို့ရာတွင် သင်လိုချင်သည့် စိတ်ကူးယဉ်အိမ်မှာ စိတ်ကူးယဉ်သည့် အဆင့်တွင်သာရှိပြီး အမှန်တကယ်ဖြစ်လာရန် ဝေးနေသေးသည့် အိမ်တစ်လုံးဖြစ်သည်။ ထို့ကြောင့် သင်သည် အိမ်တစ်လုံးရွေးချယ်ဝယ်ယူသည့်အခါတွင် လက်တွေ့ကျကျ စဉ်းစားတတ်ရန်လိုအပ်သည်။ မည်ကဲ့သို့သောအိမ်သည် သင့်အတွက် သင့်တော်မည်ဆိုသည်ကို စဉ်းစားရာတွင် ရေရှည်ကို တွက်ချက်ရန် လိုအပ်သည်။ မိမိဝယ်ယူမည့်အိမ်သည် လက်ရှိလိုအပ်ချက်များနှင့်သာမက မိမိ၏ရေရှည်အစီအမံများအတွက်ပါ သင့်တော်ကိုက်ညီစေရန် ကြိုးစားပါ။ မိမိဝယ်လိုသည့်အိမ်ကို နောက်ပိုင်းတွင် မည်ကဲ့သို့ ပြန်ရောင်းနိုင်မည် သို့မဟုတ် ထိုအိမ်မှ ဝင်ငွေရလမ်းတစ်ခုကို မည်ကဲ့သို့ ဖန်တီးနိုင်မည်ဆိုသည်ကို ထည့်သွင်းစဉ်းစားအပ်သည်။ မိမိယခုဝယ်ယူမည့်အိမ်သည် မိမိ၏တစ်ဘဝလုံးအတွက်စိတ်ကူးထားသော အိမ်မျိုးဖြစ်ရန် မလိုအပ်သေးပါ။ သို့သော် မိမိ၏လက်ရှိလိုအပ်ချက်များ၊ အနာဂတ်လိုအပ်ချက်များကို ဖြည့်ဆည်းနိုင်သည့် အိမ်မျိုးဖြစ်ရန် လိုသည်။
မှန်ကန်သည့်အိမ် ရွေးချယ်ခြင်း
အိမ်ခြံမြေအမျိုးအစားများ
- အိမ်များ။ သီးသန့်နေလိုခြင်း၊ အေးငြိမ်းသည့် ပတ်ဝန်းကျင်လိုအပ်ခြင်းတို့ဖြစ်ပါက အိမ်တစ်လုံးဝယ်ယူခြင်းသည် ကောင်းမွန်သည့် ရွေးချယ်မှုဖြစ်သည်။ မြေကိုသာဝယ်ပြီး မိမိစိတ်တိုင်းကျ အိမ်သစ်ဆောက်လုပ် နေထိုင်မည်လား၊ ယခင်အိမ်ပုံစံမျိုး ဆောက်ပြီး နေထိုင်မည်လားဆိုသည်ကို ဆုံးဖြတ်ရမည်ဖြစ်သည်။ အိမ်ဆောက်မည်ဆိုပါက အဓိကအချက်မှာ မြေပင်ဖြစ်သည်။ မြေဈေးနှုန်းသည် အကျယ်အဝန်းနှင့် တည်နေရာတို့အပေါ်တွင် မူတည်သည်။ မြေကွက်သည် လမ်းမကြီးများပေါ် သို့မဟုတ် စီးပွားရေးအရအချက်အခြာကျသောနေရာများတွင် တည်ရှိပါက အခြားနေရာများထက် ဈေးနှုန်းပိုများမည်ဖြစ်သည်။ အသစ်ဆောက်လုပ်ပြီး အိမ်တစ်လုံးဝယ်ယူခြင်းသည် မြေကွက်ဝယ်ယူပြီး ကိုယ်တိုင်အိမ်ဆောက်သည်ထက် ပို၍ကုန်ကျမည်ဖြစ်သည်။ လူနေပြီးအိမ်ကိုဝယ်ယူပါက ထိုနှစ်ခုထက် ပို၍ဈေးသက်သာမည်ဖြစ်သော်လည်း အိမ်၏အခြေအနေပေါ်လည်း မူတည်နေပေသည်။ အိမ်သည် ကောင်းမွန်သောအခြေအနေတွင်ရှိပါက များစွာပြင်ဆင်ရန်လိုအပ်မည်မဟုတ်ပါ။ သို့မဟုတ်ပါက အိမ်ပြင်ဆင်ရသည့်စရိတ်သည် အသစ်ဆောက်လုပ်ပြီးအိမ်တစ်လုံးဝယ်ယူသည့်နီးပါး ကုန်ကျနိုင်သည်။
- ကွန်ဒိုတိုက်ခန်းများ။ အိမ်ဝယ်ယူရာတွင် ကွန်ဒိုတိုက်ခန်းများကို လူအများသဘောကျကြသည်။ အကြောင်းမှာ လုံခြုံရေးနှင့် အခြားဝန်ဆောင်မှုများကို ရရှိနိုင်သောကြောင့်ဖြစ်သည်။ သို့ရာတွင် ကွန်ဒိုတိုက်ခန်းတွင်နေထိုင်ပါက မြက်ခင်းရိတ်ခြင်း၊ ယင်းလိပ်ဆေးသုတ်ခြင်း၊ အခြားပြုပြင်ထိန်းသိမ်းခြင်းဝန်ဆောင်မှုများအတွက် လစဉ်ပြုပြင်ထိန်းသိမ်းခကို ပေးရမည်ဖြစ်သည်။ မြို့လယ်နှင့်အတန်ငယ်ဝေးသောနေရာရှိ အိမ်ဈေးနှင့်ယှဉ်ကြည့်ပါက ရှုခင်းကောင်းသောမြို့လယ်ရှိ ကွန်ဒိုတိုက်ခန်းဈေးသည် နှစ်ဆ၊ သုံးဆပိုများလေ့ရှိသည်။ ထို့ကြောင့် မိမိအနေဖြင့် ဇိမ်ခံပုံစံဆန်သောအိမ်မျိုး အလိုရှိခြင်းမဟုတ်ပါက ကွန်ဒိုတိုက်ခန်းငယ်လေးများကို ပိုမိုရွေးချယ်သင့်သည်။ ကွန်ဒိုတိုက်ခန်းငယ်များတွင် ဓာတ်လှေကားနှင့် လုံခြုံရေးမှလွဲ၍ အခြားဝန်ဆောင်မှုများမရှိပါ။ ကွန်ဒိုတိုက်ခန်းငယ်များသည် ပုံမှန်ကွန်ဒိုတိုက်ခန်းကြီးများထက် ဈေးများစွာသက်သာသည်။
မိမိဝယ်ယူလိုသည့် အိမ်အမျိုးအစားကို စဉ်းစားချင့်ချိန်သည့်အပြင် www.imyanmarhouse.com ကဲ့သို့သော ဝက်ဘ်ဆိုက်များတွင်လည်း အခြားရွေးချယ်ဖွယ်ရာများကို ရှာဖွေလေ့လာနိုင်ပေသည်။ ဤဝက်ဘ်ဆိုက်တွင် အိမ်ခြံမြေနှင့်စပ်လျဉ်းသော နောက်ဆုံးပေါ် သတင်းအချက်အလက်များ၊ အခွင့်အလမ်းများကို တွေ့ရှိနိုင်မည်ဖြစ်သည်။ အိမ်ခြံမြေကိုယ်စားလှယ်တစ်ဦးဦးကလည်း အလားတူအိမ်များကို ဈေးနှုန်းများနှင့် နှိုင်းယှဉ်ဖော်ပြသည့် ဈေးကွက်လေ့လာချက်ကို ပေးနိုင်ပါသည်။ အဆိုပါနှိုင်းယှဉ်လေ့လာချက်သည် သင်အိမ်ဝယ်ယူရန်ဆုံးဖြတ်သည့်အခါ များစွာအကူအညီရစေမည်ဖြစ်သည်။ ဤကဲ့သို့လေ့လာထားခြင်းကြောင့် အိမ်တစ်လုံးဝယ်ယူရန် ဈေးကမ်းလှမ်း၍ ဈေးနှုန်းညှိနှိုင်းသည့်အခါတွင် များစွာ အထောက်အကူရစေမည်ဖြစ်သည်။
မျှဝေမည်
မျှဝေမည်