ကျန်းမာရေးစောင့်ရှောက်မှု

ကျန်းမာရေးစောင့်ရှောက်မှု အာမခံ ပုဂ္ဂလိကကုမ္ပဏီအချို့ရှိပါသည်။ သို့သော် ဈေးနှုန်းမြင့်မားမှုကြောင့် လူတစ်ချို့သာ အာမခံထား အသုံးပြုကြသည်။ မြန်မာနိုင်ငံသည် ငွေသားအခြေပြု စီးပွားရေးစနစ် ကျင့်သုံးသောနိုင်ငံဖြစ်သဖြင့် သင်သည် ဆေးရုံသို့သွားလျှင် ငွေသားဖြင့် ပေးချေရသည်။ ယင်းမှာ မျှော်မှန်း၍မရနိုင်သော ကျန်းမာရေးပြဿနာများအတွက် သင့်အနေဖြင့် ငွေစုရန်လိုအပ်သည့် အကြောင်းရင်းပင် ဖြစ်သည်

အစိုးရဆေးရုံနှင့် ကျေးလက်ဆေးပေးခန်းများတွင် စရိတ်မျှပေးစနစ်အရ ကျန်းမာရေးစောင့်ရှောက်မှုကို ခံယူနိုင်သည်။ အချို့ဆေးဝါးများအပါအဝင် ကုသမှုစရိတ်နှင့် ဆရာဝန်စမ်းသပ်ခတို့မှာ အခမဲ့ ဖြစ်သော်လည်း၊ ဆေးရုံတွင် မရှိသည့် ဆေးများကိုမူ သင်ကိုယ်တိုင် ဝယ်ရမည်ဖြစ်သည်။ အစိုးရဆေးရုံများတွင် နေ့စဉ်လူနာ အလွန်များပြားသဖြင့် စမ်းသပ်ကုသမှုခံယူရန် အချိန်ကြာမြင့်စွာ စောင့်ဆိုင်းကြရသည်။ ကျေးလက်ဒေသရှိ ကျန်းမာရေးစောင့်ရှောက်ရေးအဆောက်အအုံများ၊ လူသားအရင်းအမြစ်များမှာ ဒေသအားလုံးသို့ လွှမ်းခြုံနိုင်ခြင်း မရှိချေ။

ကျန်းမာရေးစောင့်ရှောက်မှုစရိတ်များကို မည်သို့ လျှော့ချမည်နည်း။
ကျန်းမာရေးစရိတ်များ လျှော့ချနိုင်ရေးအတွက် သင့်တွင် ကျန်းမာရေးနှင့်ညီသော နေထိုင်မှုပုံစံရှိရန် အရေးကြီးသည်။ ဤအကျိုးကျေးဇူးကိုရရှိရန် သင်၏လူနေမှုပုံစံကို ပြောင်းလဲရမည်ဖြစ်သည်။ သမရိုးကျ မြန်မာစားသောက်မှုပုံစံတွင် အဆီဓာတ်၊ ဆီပါဝင်မှု အလွန်များပြီး၊ ဟင်းသီးဟင်းရွက်၊ သစ်သီးဝလံနှင့် နို့ထွက်ပစ္စည်းစားသုံးမှု အလွန်နည်းသည်။ မြန်မာလူမျိုးတို့၏ ယင်းကဲ့သို့ သမရိုးကျစားသောက်မှုပုံစံသည် ကျန်းမာရေးပြဿနာများဖြစ်စေနိုင်သည်။  ကျန်းမာရေးနှင့် ညီသော ဓာတ်စာကိုစားပြီး လုံလောက်သော ကိုယ်လက်လှုပ်ရှားလေ့ကျင့်ခန်းများလုပ်ခြင်းအားဖြင့် မလိုလားအပ်သည့် ကျန်းမာရေးပြဿနာများကို ရှောင်ရှားနိုင်မည်ဖြစ်သည်။

အစိုးရဆေးရုံကိုသွားပါက ပိုက်ဆံပေးရန် မလိုပါ သို့မဟုတ် အနည်းငယ်သာ ပေးရသည်။ အစိုးရကျန်းမာရေးစောင့်ရှောက်မှုမှာ ကုန်ကျစရိတ်သက်သာပြီး သင့်အတွက် အကုန်အကျအနည်းဆုံးဖြစ်မည့် ရွေးချယ်မှု ဖြစ်သည်။

ယခုအချိန်တွင် မြန်မာပြည်သူများသည် ကျန်းမာရေးအာမခံအကြောင်း ကောင်းစွာမသိကြသေးချေ။ အနာဂတ်တွင်မူ ပုဂ္ဂလိကအာမခံကုမ္ပဏီများက ၎င်းတို့၏ အာမခံစနစ်များကို ယှဉ်ပြိုင်ရောင်းချလာသည့်အခါ သင့်အနေဖြင့် ဝယ်ယူနိုင်မည့် အာမခံပေါ်လစီများ ရှိလာမည်ဖြစ်သည်။ ကျန်းမာရေးအာမခံစနစ်က သင့် ကျန်းမာရေးအတွက် ကုန်ကျစရိတ်များကို ကျခံပေးမည့် နည်းလမ်းများထဲမှတစ်ခု ဖြစ်လာနိုင်သည်။