စုဆောင်းမှုဆိုင်ရာ အခြေခံများ

မြန်မာလူမျိုးအများစုသည် စုဆောင်းနိုင်သည်ထက် ပိုမိုသုံးစွဲနေရသည်။ နေထိုင်မှုစရိတ်မြင့်မားပြီး ဝင်ငွေနည်းပါးမှုကြောင့် ၎င်းတို့ ဝင်ငွေ၏  ၅ ရာခိုင်နှုန်းအောက် စုဆောင်းနိုင်ရန် ခဲယဉ်းလှသည်။ သင့်အနေဖြင့် ငွေစတင်စုဆောင်းရန် ဆန္ဒမရှိလျှင်သော်လည်းကောင်း၊ သို့တည်းမဟုတ် စုဆောင်းရန်မဖြစ်နိုင်ဟု ယုံကြည်နေပါက စုဆောင်းခြင်းကို ဝန်ထုပ်ဝန်ပိုး တစ်ခုအနေဖြင့်မကြည့်ဘဲ စိတ်လှုပ်ရှားဖွယ် အခွင့်အလမ်းများ တွေ့ကြုံရမည့် လမ်းကြောင်းတစ်ရပ်အဖြစ် မှတ်ယူလိုက်ပါ။ ဖြစ်နိုင်ခြေရှိသည်မှာ ဘဝတစ်ကွေ့ဝယ် ကောင်းကောင်းဆိုးဆိုး မျှော်လင့်မထားသော အခြေအနေကိစ္စရပ်များအတွက် ကုန်ကျစရိတ် လိုအပ်လာနိုင်သည်။ စတင်ဆောင်ရွက်ရန် အခြေခံအဆင့်များကို ယခု ဖော်ပြထားပါသည်။

• ငွေစာရင်းကို ရေးဆွဲပြီး၊ လိုက်နာသုံးစွဲပါ။ လစဉ် အသုံး စရိတ်ရေးဆွဲလျှင် ကုန်နိုင်ချေရှိသည်ထက် ပိုမိုခန့်မှန်းရေးဆွဲပါ။ သို့မှသာ ငွေပိုထွက်လာပြီး စုဆောင်းနိုင်မည်ဖြစ်သည်။
• မိမိအတွက် ဦးစွာဖယ်ထားပါ။ စုဆောင်းငွေပမာဏတစ်ခု သတ်မှတ်ထားပြီး၊ အခြားကုန်ကျစရိတ်တစ်ခုကဲ့သို့ လစဉ် ဖယ်ထားပါ။ ဝင်ငွေ သို့မဟုတ် လစာ၏ ၁၀ ရာခိုင်နှုန်းမှ ၁၂ ရာခိုင်နှုန်းခန့်ကို သီးသန့်ဖယ်ကာ စုဆောင်းပါက စုငွေတိုးပွားလာမည်ကို တွေ့မြင်ရမည်။
• အမြော်အမြင်ရှိစွာ စုဆောင်းပါ။ မိမိ၏ ရည်မှန်းချက်များနှင့် ကိုက်ညီမည့် သင့်တော်သည့် စုဆောင်းပုံနည်းလမ်းများကို ရွေးချယ်ပါ။ အကောင်းဆုံး တိုးပွားနှုန်း ရရှိရန်အတွက် လေ့လာသုံးသပ်ချက်များ ပြုလုပ်ပါ။
• ထင်မှတ်မထားသည့်အရာများအတွက် အသင့်ပြင်ထားပါ။ သုံးလမှ ခြောက်လတာ အသုံးစရိတ်နှင့် ညီမျှသော အရေးပေါ်သုံး စုဆောင်းငွေတစ်ရပ်ထားရှိပြီး မထင်မှတ်ဘဲ ရုတ်တရက်ပေါ်ထွက်လာသည့် ကုန်ကျစရိတ်များအတွက် ဖယ်ထားပါ။
• လမ်းမှန်ပေါ်ရောက်ရှိရန် ငွေကြေးဆိုင်ရာရည်မှန်းချက်များ ချမှတ်ထားပါ။ မည်၍မည်မျှကြာအောင် မည်မျှစုဆောင်းရမည် အစရှိသဖြင့် အတိအကျသိရှိရန်အတွက် ကောင်းမွန်သော ရည်မှန်းချက်များ ချမှတ်ပါ။ ရှင်းလင်းတိကျသော ရည်မှန်းချက်များထားပါက တိုးတက်မှုကို လွယ်လင့်တကူ သိရှိနိုင်မည် ဖြစ်သည်။

ကောင်းမွန်သော ရည်မှန်းချက်များ

ဘဝ၏ လက်တွေ့ကျသည့် အကြောင်းပြချက်များကြောင့် ငွေစုဆောင်းခြင်းသည် ကောင်းမွန်သည့် တွန်းအားတစ်ရပ်ဖြစ်သည်။ သင့်အနေဖြင့် အနည်းဆုံး သုံးလမှ ခြောက်လတာ ရပ်တည်နိုင်ရန် အရေးပေါ်သုံး စုဆောင်းငွေတစ်ရပ်လက်ဝယ်ရှိပြီးပါက မိမိဆန္ဒရှိသည့်အတိုင်း စတင်စုဆောင်းနိုင်ပါပြီ။ ယခု SMART လမ်းညွှန်ကို အသုံးပြုကာ ရေတိုရည်မှန်းချက် (လက်ရှိလနှင့် ယခုနှစ်အတွင်း ဝယ်ယူမှုများ) နှင့် ရေရှည် ရည်မှန်းချက် (ဘဝတွင် အရေးကြီးသော ပွဲလမ်းများနှင့် ကြီးမားသော ကုန်ကျစရိတ်များအတွက်) တို့အတွက် စဉ်းစားပါ။

သီးခြား ရည်မှန်းချက်များအတွက် အားပေးလှုံ့ဆော်မှု - ရှင်းလင်းတိကျသော ရည်မှန်းချက်များ ချမှတ်ထားခြင်းသည် ဦးတည်စုဆောင်းရန် အထောက်အကူပြုပါလိမ့်မည်။

      ဥပမာ - နွေရာသီအားလပ်ရက် အပန်းဖြေရန်အတွက် အလုံအလောက် စုဆောင်းခြင်း

တိုင်းတာနိုင်သော ရည်မှန်းချက်များသည် အမှန်တစ်ကယ်ဖြစ်တည်မှုများကို ထင်သာမြင်သာရှိစေပါသည်။ ကိန်းဂဏန်းများကို အသုံးပြုခြင်းဖြင့် တိုးတက်မှုကို တိုင်းတာနိုင်သည်။

      ဥပမာ - နွေရာသီခရီးစဉ်သည် ကျပ် ၅၀၀,၀၀၀ ကုန်ကျမည်ဖြစ်ပြီး၊ ယခု ကျပ် ၁၂၅,၀၀၀ စုဆောင်းပြီဖြစ်သည်။

ပြည့်မီနိုင်သော ရည်မှန်းချက်များ ချမှတ်ပါ - ရည်မှန်းချက်များ ချမှတ်သည့်အခါလည်းကောင်း ရည်မှန်းချက်များသည် လက်လှမ်းမီပြီး ဖြစ်နိုင်ခြေရှိပါစေ။

      ဥပမာ - အဆိုပါ ခရီးစဉ်ကုန်ကျစရိတ်အတွက် အပတ်စဉ်တိုင်း ငွေပမာဏ လုံလောက်စွာ စုဆောင်းနိုင်မည်ကို ကျွန်တော်သိသည်။

သင့်တော် ရည်မှန်းချက်များသည် ကောင်းမွန်သည့် အကျိုးသက် ရောက်မှုရှိပါသည်။ ရေရှည်တွင် အဓိပ္ပါယ်ရှိသည်ဟု သိရှိထားမှသာ ရည်မှန်းချက်တစ်ရပ်ကို ချမှတ်ပါ။

      ဥပမာ - ဟိုတယ်မှာ မနေဘဲနဲ့ စုပေါင်းအဆောင်နေပြီးတော့ ကျွန်တော် ပိုက်ဆံ စုဆောင်းနေပါတယ်။

အချိန်အတိုင်းအတာပါရှိသော ရည်မှန်းချက်များသည် တိကျသောသတ်မှတ်ချိန် တစ်ခုပါရှိသည်။ ရည်မှန်းချက်တစ်ခုအတွက် အချိန်အတိုင်းအတာ သတ်မှတ်ထားခြင်းဖြင့် အောင်မြင်အောင် လုပ်ဆောင်ရန် ဆုံးဖြတ်ထားရာ ရောက်ပေလိမ့်မည်။

      ဥပမာ - လာမယ့် နွေရာသီအားလပ်ရက်တွင် အပန်းဖြေခရီးတစ်ခု သွားချင်ပါတယ်။