ကောလိပ်ကျောင်းအတွက် ငွေစာရင်းရေးဆွဲခြင်း

ကလေးများ ကျောင်းပြီးသည်အထိ မိဘများက တာဝန်ယူလေ့ရှိသည်။ သင့်အားပေးသည့် အသုံးစရိတ်အား မည်မျှ သုံးမည်၊ မည်မျှ စုမည်တို့ကို စီမံခန့်ခွဲရန်သာ လိုသည်။ သင်သည် ရင်းနှီးမြှုပ်နှံမှုများ ပြုလုပ်နိုင်မည် မဟုတ်သော်လည်း အဝတ်အစား၊ တယ်လီဖုန်း စသည့် အခြေခံပစ္စည်းများဝယ်ယူခြင်း သို့မဟုတ် ခရီးထွက်ခြင်းတို့အတွက် သင် သုံးစွဲနိုင်မည် ဖြစ်သည်။

ကောလိပ်ကျောင်းစရိတ်ကို သင့်မိဘက တာဝန်ယူထားသော်လည်း သင့်အနေဖြင့် အချိန်ပိုင်း အလုပ်လုပ်ပြီး ကုန်ကျစရိတ်အတွက် တစ်စိတ်တစ်ပိုင်း ထည့်ဝင်နိုင်ပါက ပိုမိုကောင်းမွန်သည်။ တချို့ကျောင်းသားများ အထူးသဖြင့် အထက်တန်းစာမေးပွဲကြီးတွင် ဂုဏ်ထူးဖြင့်အောင်မြင်သော ကျောင်းသားများမှာ စာမေးပွဲပြီးကတည်းက အချိန်ပိုင်းအလုပ်များ လုပ်လေ့ရှိသည်။ အထက်တန်းကျောင်းသားများကို စာပြပေးခြင်းဖြင့် ဝင်ငွေရှာကာ အဆိုပါဝင်ငွေကို ကောလိပ်စရိတ်အတွက် စုဆောင်းထားနိုင်မည် ဖြစ်သည်။ LCCI ကဲ့သို့ တစ်ကမ္ဘာလုံး အသိအမှတ်ပြုလက်မှတ်ရရှိပါက ကုမ္ပဏီငယ်များတွင် အချိန်ပိုင်းစာရင်းကိုင်အလုပ် ရရှိနိုင်သည်။

ကျောင်းသားနှင့် မိဘအများစုသည် ကောလိပ်တက်ပါက ငွေကြေးအများအပြားလိုအပ်မည်ဟု မျှော်မှန်းထားပြီး ငွေမည်သို့ ရှာမည်၊ မည်သို့ ငွေစုမည်ဆိုသည့် (အများအားဖြင့် ရှင်းရှင်းလင်းလင်း မဟုတ်ဘဲ) အစီအစဉ်များ ရှိကြသည်။ သို့သော် ကောလိပ်တက်ရောက်ရေးကုန်ကျစရိတ်အတွက် စနစ်တကျ ဘတ်ဂျက်ရေးဆွဲထားမှု မရှိချေ။ သင်၏ ငွေကြေးစီးဆင်းမှုကို ထိထိရောက်ရောက်ခန့်မှန်းနိုင်ပါက ဝင်ငွေနှင့် ထွက်ငွေတို့ကို ကောင်းမွန်စွာ စီမံခန့်ခွဲနိုင်မည် ဖြစ်သည်။

အိမ်ရာ
မြန်မာနိုင်ငံတွင် လူငယ်များမှာ မိသားစုနှင့်သာနေလေ့ရှိကြသည်။ မိသားစုနှင့် နေထိုင်သဖြင့် အစားအသောက်အတွက် ငွေကြေးပေးရန် မလိုအပ်ချေ။

မိသားစုအိမ်မရှိပါက ကျောင်းသားများမှာ ကျောင်းအဆောင်၊ အပြင်ဆောင်ကို ရှာကြရသည်။

• ကျောင်းအဆောင်။ –  ကျောင်းတက်နေစဉ်အတွင်း နေထိုင်နိုင်သည့် ကျောင်းအဆောင်နေခွင့်ကို တက္ကသိုလ်ကျောင်းသားများ လျှောက်ထားနိုင်သည်။ အဆောင်ခမှာ အလွန်သင့်တင့်သည်။ သို့သော် နေရာအကန့်အသတ်ရှိသဖြင့် ကျောင်းသားအားလုံးအတွက် လုံလောက်မှု မရှိပေ။ ကျောင်းသားများ စားသောက်ရန် တက္ကသိုလ်က စီစဉ်ပေးသည်။ (အစားအသောက်အပိုင်းကို ကြည့်ပါ။)
• ပြင်ပဆောင် – တက္ကသိုလ်အနီးတွင် ကျောင်းသားကျောင်းသူများအတွက် ပုဂ္ဂလိကအဆောင်များရှိသည်။ ကျောင်းတွင် အဆောင်မရပါက အဆိုပါ ပြင်ပဆောင်များတွင် နေစရာ ရှာနိုင်သည်။ ကျောင်းအဆောင်များ ထက် ပိုမိုဈေးကြီးပြီး ကျောင်းအဆောင်များတွင်လောက် သက်သောင့်သက်သာ မရှိချေ။ ကျောင်းသားကျောင်းသူများက အစားအသောက်ကို မိမိဘာသာ စီစဉ်ရသည်။
• စုပေါင်းအခန်း – နောက်တစ်နည်းမှာ အိမ်တစ်လုံးငှားပြီး သူငယ်ချင်းများနှင့် စုပေါင်းနေထိုင်ခြင်း ဖြစ်သည်။ ယင်းမှာ ပိုမိုကုန်ကျစရိတ်များသော်လည်း သူငယ်ချင်းများနှင့်အတူ ကုန်ကျစရိတ်ကို မျှခံနိုင်သည်။ မိမိအစီအစဉ်ဖြင့် မိမိ စားသောက်ရသည်။

 

မည်သည့်ရည်ရွယ်ချက်အတွက် ငွေမည်မျှသုံးမည်ဆိုသည်ကို ငွေစာရင်းရေးဆွဲထားသင့်ပြီး ကျန်းမာရေးကိစ္စနှင့် မမျှော်လင့်သော ကိစ္စများကဲ့သို့ အရေးပေါ်ငွေလိုအပ်မှုအတွက် ငွေစုဆောင်းထားသင့်သည်။

စာအုပ်များ
ကျောင်းသားများသည် ဖတ်စာအုပ်အသစ် သို့မဟုတ် အဟောင်းကို ဝယ်နိုင်သည်။

အတန်းကြီးများထံမှ ဖတ်စာအုပ်ကို တစ်ဝက်ဈေးနှင့် ဝယ်နိုင်သလို သင့်စာအုပ်များကိုလည်း စာသင်နှစ်ပြီးပါက ပြန်ရောင်းနိုင်သည်။

ဖတ်စာအုပ် မဝယ်လိုပါက တက္ကသိုလ်စာကြည့်တိုက်မှ ငှားနိုင်သည်။ သို့သော် ကျောင်းသား အများအပြားကို ငှားပေးရန်အတွက်မူ တက္ကသိုလ်တွင် ဖတ်စာအုပ် အလုံအလောက် မရှိပေ။ 

အစားအစာ
အိမ်မှနေ၍ တက္ကသိုလ်တက်ပါက အိမ်မှ နေ့လယ်စာ ထမင်းဗူးယူ သွားကာ အသုံးစရိတ် ချွေတာနိုင်သည်။

အပန်းဖြေမှု
လူငယ်များမှာ သူငယ်ချင်းများနှင့် ရုပ်ရှင်ကြည့်ခြင်း၊ ဈေးဝယ်ခြင်းနှင့် ခရီးထွက်ခြင်းများ ပြုလုပ်လေ့ရှိသည်။ ပေါင်းသင်းဆက်ဆံရေးနှင့် အပန်းဖြေရေး စရိတ်စကမှာ လူငယ်တစ်ဦးချင်းအလိုက် ကွာခြားသည်။ သို့သော် သင်ရေးဆွဲထားသောဘတ်ဂျက်ကို အမြဲ စိတ်ထဲတွင်ထားကာ ကုန်ကျစရိတ်များကို ခြေရာခံမှတ်သားထားခြင်းအားဖြင့် လမကုန်ခင် ငွေပြတ်သွားသည့်အဖြစ်မျိုးမှ ရှောင်ရှားနိုင်မည် ဖြစ်သည်။

ပို့ဆောင်ရေး
တက္ကသိုလ်များမှာ မြို့ထဲမှ ၁၀ မိုင် အထက် ဝေးကွာလေ့ရှိသဖြင့် ကောလိပ်တက်ရာတွင် ပို့ဆောင်ဆက်သွယ်ရေးမှာ လူငယ်များအတွက် အဓိကကျသောကိစ္စတစ်ခု ဖြစ်သည်။ အသုံးပြုသည့် ပို့ဆောင်ရေးနည်းလမ်းအပေါ် မူတည်၍ ကုန်ကျစရိတ် အလွန်အမင်း ကွာခြားတတ်သဖြင့် ပို့ဆောင်ဆက်သွယ်ရေးစရိတ်မှာ အဓိကကုန်ကျစရိတ် ဖြစ်နိုင်သည်။

အများပြည်သူပို့ဆောင်ရေးမှာ ရထားနှင့် ဘတ်စ်ကားဖြစ်သည်။ ရထားစီးခြင်းမှာ စရိတ်အသက်သာဆုံးနည်းလမ်းဖြစ်ဖွယ် ရှိသည်။ ရထားဘူတာသို့သွားရသည့် အခက်အခဲနှင့် ရထားချိန် မမှန်မှုများကြောင့် လူတိုင်းက ရထားစီးမည် မဟုတ်ချေ။

ဘတ်စ်ကားလမ်းကြောင်းမှာ လွယ်လင့်တကူ ရောက်ရှိနိုင်ပြီး ကိုယ်ပိုင်ပို့ဆောင်ရေးထက် ဈေးသက်သာသဖြင့် လူငယ် အများအပြားက ဘတ်စ်ကားကို ပိုမိုသဘောကျကြသည်။

ကိုယ်ပိုင်ပို့ဆောင်ရေးမှာ ရွေးချယ်စရာ အခြားနည်းလမ်းတစ်ခု ဖြစ်ကာ ယင်းတွင် ကိုယ်ပိုင်ဖယ်ရီ၊ တက္ကစီနှင့် ကိုယ်ပိုင်ကားတို့ ပါဝင်သည်။ ကိုယ်ပိုင်ဖယ်ရီမှာ အများအားဖြင့် ကောလိပ် ကျောင်းသားများ သို့မဟုတ် ဘတ်စ်ကားပိုင်ရှင်များက သီးသန့် စီစဉ်ထားသည့် ကိုယ်ပိုင်ဘတ်စ်ကားများ ဖြစ်သည်။ ယင်းတို့မှာ အများပြည်သူသုံးဘတ်စ်ကား လမ်းကြောင်းအတိုင်းမသွားဘဲ ဖယ်ရီစီးသည့် ကျောင်းသားများ နေရပ်အပေါ် မူတည်၍ ဘတ်စ်ကားလမ်းကြောင်းကို ပြေးဆွဲသည်။ ဖယ်ရီစီးသည့် ကျောင်းသားအရေအတွက်မှာ ၂၀ မှ ၅၀ အထိ ရှိမည်ဖြစ်သည်။ သင်ကိုယ်တိုင် ဖယ်ရီဆွဲပြီး အပိုဝင်ငွေရှာနိုင်သည်။

သင့်တွင် ငွေကြေးအခက်အခဲသိပ်မရှိဘဲ တတ်နိုင်မည်ဆိုပါက သင့် ကိုယ်ပိုင်ကားဖြင့် ကျောင်းတက်နိုင်သည်။ အချိန်ကုန် သက်သာပြီး ခရီးလမ်းကြောင်းကို စိတ်ကြိုက်အပြောင်းအလဲ လုပ်နိုင်သည်။

အလုပ်
ကျောင်းသားကျောင်းသူများသည် ကျောင်းတက်နေစဉ် ငွေကြေးလိုအပ်ပါလာပါက မြန်မာတက္ကသိုလ်များက အလုပ် မပေးနိုင်ချေ။ သို့သော် လူငယ်များအနေဖြင့် ကောလိပ်တက်နေစဉ် အလုပ်လုပ်လိုပါက ကုမ္ပဏီအသေးများတွင် အချိန်ပိုင်းအလုပ်လုပ်နိုင်သည်။ စနေ၊ တနင်္ဂနွေ ရုံးပိတ်ရက်နှင့် စာသင်နှစ်ဝက်ပိတ်ရက်ကာလများ၌ အလုပ်လုပ်နိုင်သည်။

ယခုအခါ ကုမ္ပဏီအများအပြားမှာ တက္ကသိုလ်များမှ အလုပ်သင်များ ခေါ်ယူလာကြသဖြင့် ကျောင်းပိတ်ရက်များတွင် အလုပ်သင်ဆင်းနိုင်မည့် သတင်းများ စူးစမ်းရှာဖွေနိုင်သည်။ ရန်ကုန်စီးပွားရေးတက္ကသိုလ်၊ အမျိုးသားစီမံခန့်ခွဲမှုပညာဒီဂရီကောလိပ်နှင့် သတင်းအချက်အလက်နှင့်နည်းပညာတက္ကသိုလ်ကဲ့သို့ ကျောင်းများတွင် မိမိတို့ ကျောင်းသားများအတွက် အလုပ်သင်ခန့်ထားသည့် အစီအစဉ်များ ရှိသည်။

အလုပ်သင်ဆင်းခြင်းက ကျောင်းပြီးသည့်အခါ အလုပ်ကောင်းကောင်းရရှိရန် များစွာအထောက်အကူပြုသည်။