လင်မယားကွာရှင်းခြင်း

ကွာရှင်းပြတ်စဲခြင်းကိစ္စရပ်ကိုဆောင်ရွက်ရာတွင် ရှေ့နေများ၊ အိမ်ပိုင်ဆိုင်မှု၊ ကလေးအုပ်ထိန်းခွင့်၊ ကလေးထောက်ပံ့ခြင်း၊ ပိုင်ဆိုင်မှုခွဲဝေခြင်းတို့နှင့် စပ်လျဉ်း၍ ဆုံးဖြတ်ချက်များချမှတ်ရန် လိုအပ်လိမ့်မည်။

ရှေ့နေများနှင့် ကြားဝင်စေ့စပ်သူများ
ကွာရှင်းပြတ်စဲလိုသောသူများအနေဖြင့် ဥပဒေဆိုင်ရာကိစ္စရပ်များနှင့်စပ်လျဉ်း၍အကူအညီများပေးအပ်နိုင်မည့် ရှေ့နေများနှင့် ပူးပေါင်းဆောင်ရွက်ရန် လိုအပ်တတ်သည်။ ရှေ့နေ့ငှားရမ်းခြင်းအတွက် ကုန်ကျစရိတ်များရှိနိုင်သော်လည်း ပိုင်ဆိုင်မှုများကို မျှတစွာဖြင့် တရားဝင် မည်ကဲ့သို့ခွဲဝေရမည်ဆိုသည့် ကျွမ်းကျင်မှုမျိုးသည် ရှေ့နေများတွင်သာ ရှိခြင်းဖြစ်သည်။

သင်ရှေ့နေလိုအပ်ပါသလား။
မိမိနှင့် မိမိအိမ်ထောင်ဘက်တို့နှစ်ဦးလုံးက သဘောတူညီပါက ကွာရှင်းပြတ်စဲခြင်းကို ကြားနေ၍စေ့စပ်သူတစ်ဦး၏အကူအညီဖြင့် ဆောင်ရွက်နိုင်ပါသည်။ နှစ်ဦးသဘောတူအေးချမ်းစွာလမ်းခွဲခြင်းဖြစ်စေကာမူ လင်မယားနှစ်ဦးလုံးအတွက် တရားမျှတစွာ ဆုံးဖြတ်နိုင်ရန်မှာ ခက်ခဲပါသည်။ ရှေ့နေတစ်ဦးသည် သင့်အား ခက်ခဲသောဆုံးဖြတ်ချက်များချနိုင်ရန်အတွက် ကူညီပေးနိုင်မည့် သူပင်ဖြစ်သည်။

ရှေ့နေရှာဖွေခြင်း
ရှေ့နေတစ်ဦးကိုမှန်ကန်စွာရွေးချယ်ရှာဖွေနိုင်ခြင်းသည်လည်း အရေးကြီးပေသည်။ ခက်ခဲသောလုပ်ငန်းစဉ်တစ်လျှောက်လုံးတွင် မိမိကို လမ်းညွှန်ပေးနိုင်ရန်အတွက် မိမိယုံကြည်ရသူတစ်ဦးဖြစ်ရန် လိုအပ်သည်။ ရှေ့နေဖြစ်လာမည့်သူ၏ လုပ်ငန်းအတွေ့အကြုံများ၊ ကျွမ်းကျင်တတ်မြောက်မှုများကို ဂရုပြုစစ်ဆေးရန်လိုအပ်သည်။ သို့မှသာ ကွာရှင်းမှုပြုလုပ်ရာတွင် မိမိအကျိုးအတွက် အမှုဆောင်ပေးမည့် အကောင်းဆုံးသူကို ရရှိနိုင်မည်ဖြစ်သည်။

တရားရေးရာကိစ္စများအတွက် ကုန်ကျစရိတ်များ လျှော့ချခြင်း
ဖြစ်နိုင်ပါက ရှေ့နေခကို ညှိနှိုင်း၍ သတ်မှတ်ထားပါ။ သို့မဟုတ်ပါက မိမိအမှုတွင် တက်ကြွစွာပါဝင်ဆောင်ရွက်ကာ ရှေ့နေ၏ညွှန်ကြားချက်များကို ဂရုပြုလိုက်နာဆောင်ရွက်ခြင်းအားဖြင့် ရှေ့နေခများကို လျှော့ချနိုင်သည်။ ရှေ့နေသည် မိမိအတွက် အကျိုးဆောင်ခြင်းမပြုမီ သင့်အနေဖြင့် ရှေ့နေခအတွက် သဘောတူညီချက်ကို စာရွက်စာတမ်းဖြင့် လက်မှတ်ထိုးထားရန် လိုအပ်ပါလိမ့်မည်။ ဤသည်မှာ မိမိ၏ရှေ့နေက မိမိထံမှ ကောက်ခံမည့် အဖိုးအခကိုထည့်သွင်းရေးသားထားသော တရားဝင်စာရွက်စာတမ်းတစ်ခုဖြစ်သည်။

ကွာရှင်းခြင်းနှင့် အိမ်ပိုင်ဆိုင်မှု
အိမ်တစ်လုံးကို ပိုင်ဆိုင်မှုတစ်ခုဆိုသည်ထက်ပိုသောပုံစံမျိုးဖြင့် ထင်မြင်တတ်ကြပါသည်။ အိမ်ဆိုသည်မှာ မိမိနေထိုင်ရာနေရာဖြစ်သည်။ မိမိ၏အိမ်ဟူသောခံစားမှုမျိုးရရှိရန်အတွက် မိမိကိုယ်တိုင် ကြိုးစားဖန်တီးထားရခြင်းမျိုးရှိနိုင်သဖြင့် ကွာရှင်းပြတ်စဲကြသောအချိန်တွင် မိမိ၏အိမ်ကို စွန့်လွှတ်ရေးဆုံးဖြတ်ရန်မှာ အလွန်ခက်ခဲနိုင်ပါသည်။ ကွာရှင်းခြင်းဆိုင်ရာဥပဒေသည် ကိုးကွယ်ရာဘာသာအပေါ် မူတည်၍ကွဲပြားမှုရှိသည်။

ပိုင်ဆိုင်မှုများ ခွဲဝေခြင်း
မိမိနှင့် မိမိအိမ်ထောင်ဘက်တို့သည် မည်သည်တို့ကို ညီတူညီမျှပိုင်ဆိုင်ခွင့်ရှိကြောင်း၊ မိမိ၏ကိုယ်ပိုင်ပိုင်ဆိုင်မှုသည် မည်သည်ဖြစ်ကြောင်း သိရှိရန်လိုအပ်သည်။ တန်ဖိုးတွက်ချက်ရန် ခက်ခဲသည်ဟုထင်ရသော်လည်း ရိုးရှင်းသောတွက်ချက်နည်းတစ်ခုဖြင့် တွက်ချက်နိုင်သည်။

အသားတင်တန်ဖိုး = ပိုင်ဆိုင်မှုများ - ပေးဆပ်ရန်ရှိသည်များ

ပိုင်ဆိုင်မှုခွဲဝေခြင်းဥပဒေသည်လည်း ကိုးကွယ်ရာဘာသာအပေါ် မူတည်၍ ကွဲပြားသည်။

ပိုင်ဆိုင်မှု အမျိုးအစား (၃) မျိုးရှိပါသည်။

• ပူးတွဲပိုင်ဆိုင်မှုများ – ငွေစုအကောင့်များ၊ နှစ်ဦးပိုင်စီးပွားရေးများအပါအဝင် နှစ်ဦးအတူတူ ထားရှိထားသော ပိုင်ဆိုင်မှုများ။
• မိမိ၏ပိုင်ဆိုင်မှုများ – အိမ်ထောင်မပြုခင် မိမိဖွင့်ထားသော၊ မိမိတစ်ဦးတည်းက ငွေထည့်သွင်းထားသော အကောင့်များ။ အိမ်ထောင်မပြုခင် မိမိပိုင်ဆိုင်ထားသော အရာအားလုံးပါဝင်သည်။
• ဇနီး/ခင်ပွန်း၏ ပိုင်ဆိုင်မှုများ – ကိုယ်ပိုင် ပင်စင်အကောင့်နှင့် မိသားစုဝင်များထံမှ အမွေဆက်ခံရရှိထားသော ပိုင်ဆိုင်မှုများအပါအဝင် အိမ်ထောင်မပြုခင်က ပိုင်ဆိုင်ထားသောအရာအားလုံး ပါဝင်သည်။

မိမိအနေဖြင့် အိမ်ခြံမြေ၊ အနုပညာပစ္စည်းများ၊ စုဆောင်းထားသည့်ပစ္စည်းများ၏တန်ဖိုးကို သိရှိနိုင်ရေး တန်ဖိုးဖြတ်ရန်လိုအပ်လာနိုင်သည်။ နှစ်ဦးပိုင်စီးပွားရေးလုပ်ငန်းရှိပါက မိမိအိမ်ထောင်ဘက်၏ လုပ်ငန်းရှယ်ယာပိုင်ဆိုင်မှုကို ပြန်လည်ဝယ်ယူနိုင်မည့်ငွေပမာဏကို သိရှိရန် ၎င်းလုပ်ငန်း၏တန်ဖိုးကို ဈေးဖြတ်ထားရန်လိုအပ်လိမ့်မည်။