မိဘဘဝ ရောက်ရှိခြင်း

မိဘဘဝအတွက် ပြင်ဆင်စီစဉ်ခြင်း
မိဘဘဝအတွက် ပြင်ဆင်မှုပြုလုပ်ရာတွင် ကလေးကို မည်သည့်နေရာတွင် မွေးဖွားမည်၊ မည်သည့်ခွဲစိတ်ဆရာဝန်ဖြင့် မွေးဖွားမည်ဆိုသော အချက်တို့ကို စတင်၍ ဆုံးဖြတ်ရမည်။ ယေဘုယျ အားဖြင့် ပုဂ္ဂလိကဆေးရုံနှင့် အစိုးရဆေးရုံတို့ဟူ၍ ရွေးချယ်ဖွယ်ရာနှစ်မျိုးရှိသည်။ ကိုယ်ဝန်ဆောင်စောင့်ရှောက်မှုစရိတ်စကများတွင် ဆရာဝန်ထံ လစဉ်ပြသခြင်း၊ ကလေးသေးခံ၊ မိခင်နှင့်ကလေးဖြည့်စွက်စာများအပါအဝင် ကလေးပစ္စည်းဝယ်ယူခြင်းတို့အတွက် ပါဝင်သည်။ လူအများစုသည် အစိုးရဆေးရုံများတွင် ကလေးမီးဖွားမှုကုန်ကျစရိတ်ကို တတ်နိုင်ကြသော်လည်း ကလေးမီးဖွားပြီးနောက် စိတ်ကျေနပ်ဖွယ်ရာ ပြုစုစောင့်ရှောက်မှုရှိမရှိကိုမူ အာမခံချက်မရှိပါ။ ပုဂ္ဂလိကဆေးရုံများတွင် ဝန်ဆောင်မှုများသည် ပိုမိုသာလွန်ကောင်းမွန်သော်လည်း ကုန်ကျစရိတ်မှာမူ အစိုးရဆေးရုံတွင်ကျသင့်မည့် ကုန်ကျစရိတ်ထက် အနည်းဆုံး သုံးဆပိုမည်ဖြစ်သည်။  

ဆေးရုံမှဆင်းပြီးနောက် ကလေး၏အခြေခံလိုအပ်ချက်များအတွက် ကုန်ကျစရိတ်များအပြင် ထပ်မံကုန်ကျနိုင်သည်မှာ ကလေးထိန်း သို့မဟုတ် သူနာပြုငှားရမ်းခြင်း၊ ကာကွယ်ဆေးထိုးနှံခြင်းတို့အတွက်ဖြစ်သည်။

မဖြစ်မနေထိုးနှံရမည့်ကာကွယ်ဆေးများကို အစိုးရက အခမဲ့ ထိုးနှံပေးသည်။

တစ်ဦးတည်းဝင်ငွေနှင့် နှစ်ဦးဝင်ငွေ
ယနေ့အချိန်အခါတွင် နေ့စဉ်အခြေခံလိုအပ်ချက်များကို ဖြည့်ဆည်းနိုင်ရန်အတွက် မိဘနှစ်လုံးသည် အချိန်ပြည့်အလုပ်လုပ်ရလေ့ရှိသည်။ ထိုအခါ ကလေးကို မည်သူက ကြည့်ရှုမည်နည်းဆိုသည့်ကိစ္စ ပေါ်လာပြီဖြစ်သည်။

• အလုပ်နှစ်ခုစလုံးက ဝင်ငွေကောင်းပါသလား။  သင့်အနေဖြင့် လက်ရှိအလုပ်ဝင်ငွေဖြင့် မကျေနပ်ပါက လစာပိုရမည့်အလုပ်ကို အမြဲရှာဖွေနေရမည်ဖြစ်သည်။ ကလေးထိန်းငှားရသည့် ကုန်ကျစရိတ်နှင့် မိသားစု၏ ဝင်ငွေစုစုပေါင်းကို ချိန်ဆကြည့်ရန် အကြံပြုလိုသည်။
• အလုပ်မလုပ်ဘဲ နေနိုင်ပါသလား။ သင်သည် အလုပ်ထွက်မည်ဆိုပါက စွန့်စားရာကျမည်ဖြစ်သည်။ ထို့ကြောင့် သင် သို့မဟုတ် သင့်အိမ်ထောင်ဘက်၏ ဝင်ငွေသည် ခိုင်မာမှုမရှိသေးခင်အချိန်အထိ အလုပ်ဆက်လုပ်နေခြင်းက ပိုကောင်းသည်။ သို့မှသာ ရေရှည်တွင် ငွေကြေးပြတ်လတ်နိုင်မှု ပြဿနာများကို ရှောင်ရှားနိုင်မည်။

မီးဖွားခွင့်နှင့် အမျိုးသမီး မီးဖွားသည့်အတွက်ခွင့် (အမျိုးသားအတွက်)
    မြန်မာနိုင်ငံရှိ အလုပ်သမားဥပဒေအရ မိခင်တစ်ဦးသည် လစာပြည့်ခွင့်သုံးလ ခံစားခွင့်ရှိသည်။ ကလေးမမွေးမီ တစ်လခွဲနှင့် မွေးဖွားပြီး တစ်လခွဲအဖြစ် ခံစားခွင့်ရှိသည်။

ဖခင်အတွက်မူ ဇနီးဖြစ်သူ မွေးဖွားပြီးနောက် လစာမဲ့ခွင့်တစ်လကို ယူခွင့်ရှိသည်။

ကလေးပြုစုစောင့်ရှောက်မှု

ကလေးပြုစုစောင့်ရှောက်ရေးပုံစံ ရွေးချယ်မှုသည် ကလေးမမွေးမီ မိမိရေးဆွဲထားသည့်ငွေစာရင်းအပေါ်တွင် မူတည်သည်။

• နေ့ကလေးထိန်းကျောင်းများ – အစိုးရဖွင့်လှစ်ထားသော နေ့ကလေးထိန်းကျောင်းများ ရှိသော်လည်း လူတိုင်းအတွက် အကျုံးမဝင်ပါ။ ပုဂ္ဂလိကနေ့ကလေးထိန်းကျောင်းများ ရှိသော်လည်း စရိတ်စကမှာ ကျောင်းပေါ်တွင်သာ မူတည်သည်။
• မိသားစုနေ့ကလေးထိန်းကျောင်း – အချို့မိသားစုများတွင် အဘိုးအဘွားများက မြေးဖြစ်သူကို ထိန်းကျောင်းရလေ့ရှိသည်။ အချို့သော အန်ဂျီအိုများနှင့် ပုဂ္ဂလိကအဖွဲ့အစည်းများသည် မိခင်များအား ၎င်းတို့၏ကလေးများကို အလုပ်ခွင်သို့ ခေါ်လာခွင့်ပြုထားသည်။
• ကလေးထိန်းများ – အချို့မိသားစုများတွင် မိဘနှစ်ပါးစလုံးက အလုပ်လုပ်လျက်ရှိပြီး ကလေးကြည့်ပေးမည့် ဆွေမျိုးများလည်းမရှိပါက ကလေးထိန်း ငှားရမ်းလေ့ရှိပြီး အခြားရွေးစရာနည်းလမ်း မရှိတော့ချေ။